由肥媽、李家鼎、游嘉欣擔任主持嘅《肥媽李鼎打大佬》集集主題新鮮，第三集講到「職場求生術」，肥媽大拋金句向游游傳授職場秘笈：「出嚟做嘢，最緊要問心無愧，唔好有害人嘅心，但係防人之心不可無！」
之後肥媽再以「手袋論」教游游做人：「如果上司都未拎 5、6 萬嘅手袋，你就揸住個 5、6 萬手袋返工，你傻㗎咩？啲人會諗你係咩人，幾錢人工呀？人言可畏呀！」
今集肥媽興奮指數爆標，並笑笑口提及鼎爺陳年緋聞，嚇到游游 O 嘴：「鼎爺都有啲好激嘅是非，話阿爺喺公司都可以隨街打真軍喎！」喺娛樂圈打滾多年嘅鼎爺仲會分享電視城奇遇，大爆兩位名人之後做 PA（助理編導）趣事。鼎爺先講第一單：「有套劇預咗好重 Budget 喺架車度，點知道具同事唔知，將租車錢使咗去（第二啲）道具度，監製導演發晒爛渣，因為冇車用。之後有個 PA 攞咗兩條車匙出嚟，話：『一架係開篷，一架唔係開篷，你哋自己揀啦！』我哋成廠人一齊『吓』咗出嚟！」
另一單料同樣勁爆，鼎爺話：「當年拍武俠片，睇完外景通常都例牌食公司。嗰日就同埋個 PA 一齊食，個 PA 就話去乜乜門啦，我哋一個二個都唔好意思出聲。食完飯個 PA 就話去一去洗手間，佢去完洗手間出嚟話走得喇，原來佢攞咗張金卡出嚟埋單！」鼎爺仲話嗰位 PA 每朝都有名車接送上班。想知究竟係邊兩位名人之後，就要記得收睇節目喇！
《肥媽李鼎打大佬》：逢周一至三點 晚10 點半播出