盧海鵬日前出席由無綫電視藝員訓練班畢業同學組成嘅「藝進同學會」聚會，見到當年喺第三期藝訓班嘅同班同學鄧英敏，佢哋即暢談近況，鵬哥更指自己右眼已失明。
鵬哥於32歲那年參加藝訓班，比同班同學鄧英敏大10年，不過鵬哥一向人緣不錯，喺圈中有不少老友，當鄧英敏問起鵬哥近況，鵬哥就話「隻眼盲咗」，原來長期糖尿病引致隻眼青光眼，鵬哥後來知道都冇得醫，「右眼盲，另一隻就冇事」。
鵬哥目前仍有堅持每朝一個鐘頭慢跑，之後去食買麵包再沖杯嘢飲當早餐，鄧英敏喺影片問到鵬哥下個月農曆新年有咩節目安排，鵬哥直言冇咩打算：「過咩節都係咁，我屋企人全部喺加拿大，剩番我一個喺度；大陸屋企人就死晒，父母兄弟、阿哥阿嫂都死晒。」鄧英敏聞言就話鵬哥喺香港有一班好朋友、一班同學喺身邊，陪吓傾吓偈都好。被問會唔會復出演戲，鵬哥話可以做就做，「做戲嘅嘢你撩到就有戲癮，你唔撩就係咁呆呆滯滯」。 
盧海鵬於2018年曾做「通波仔」手術，當時苗僑偉與戚美珍陪盧海鵬就糖尿病睇醫生，發現盧海鵬其中一條血管阻塞90%，資深傳媒人汪曼玲曾透露杜琪峯及古天樂亦不斷勸鵬哥做手術，由古仔先墊支20萬醫療費用，其後盧海鵬向保險索償。