30歲吳千語去年底嫁畀拍拖五年多嘅百億富三代施伯雄（Brian），正式成為施太。近年吳千語愛得高調，不時偕同老公施伯雄喺社交平台放閃，更以情侶身份高調現身一個內地綜藝節目，幕前幕後出雙入對高調晒愛，千語早前錄製內地綜藝節目播出新嗰集見佢大方談及未婚前嘅戀情，仲毫不忌諱舊事重提，雖然未開名，不過千語似係講緊同舊愛林峯嘅情史。 
千語未結識現任丈夫結婚前，廣為人知嘅戀情就係同林峯嘅關係，當時男方深愛女方，高調認愛給予女友正印身份，最經典係林峯喺2013年4月錄影《勁歌金曲》受訪時發表愛的宣言，喺鏡頭前公開講足7次好愛BB，呢一席話雖然早已夢碎，但現在兩人已經各自搵到幸福。
今次千語喺節目鮮有談及舊愛，並公開感謝過往呢段情，表明唔介意跟另一半提起過往情史，強調自己唔會呷醋，提到對於過往感情事對自己有何幫助，雖然千語未有直接提及「林峯」兩字，但佢講到18歲往事，明係講緊同林峯嘅一段情：「我覺得讓我快速成長，因為我18歲時很多人會關注到我，然後就會有狗仔甚麼的，就感覺我那個時候，非常地沒有人身自由，讓我現在再經歷一次這樣，我未必可以承受得了。」
千語坦言當時因為呢段情一舉一動成為焦點，令佢壓力倍增並覺得好害怕，千語曾有段時間將自己收埋：「其實這樣藏着也挺累的，所以我現在完全敞開來，就是你想看甚麼，你們想知道甚麼，我就分享給你們看。」因此千語不時喺網上同大家分享日常生活，千語指老公施伯雄都認識自己身邊嘅一班好朋友，蔡卓妍(Sa)就係其中之一，阿Sa亦喺節目對施怕雄讚不絕口，施怕雄獲得千語好友高度評價。