/public/article/images/202401/b96c48ec-8a0c-4037-aae4-688803dc858d.jpg)
TVB劇集《妳不是她》逢周一至五晚八點半翡翠台播映，噚晚（4號）劇情與前晚一樣，集中講述阿信（丁子朗飾）好友阿木（馬貫東 飾）與太太敏兒（彭慧中飾）嘅故事。敏兒前男友阿輝（翟威廉飾）出獄後纏著敏兒要錢，並以俊仔（王瑋程飾）為餌索價100萬。
彭慧中對住阿仔嘅眼神好有愛。
彭慧中嘅角色成日都要滿懷心事咁。
彭慧中雖然首度飾演人母，但唔少網民都覺得佢演得好似。
為免俊仔受騷擾及想盡快回復正常生活，敏兒瞞住阿木借錢應急，因而令阿木意外得悉愛妻被威脅，為盡快解決阿輝呢個計時炸彈，阿木喺化身「背心雙煞」好友阿信及阿Man（黃庭鋒飾）陪同下企圖兇走阿輝，卻反遭阿輝設局兼被捉往差館，被惹怒嘅阿輝捉住敏兒到財務公司借錢兼影裸照，事件最終演變成商場追逐戰，經過一輪「亂打」，夏莉（馮盈盈飾）憑一張摺櫈成功收服阿輝…
「渣男」翟威廉問彭慧中攞100萬係天經地意咁，真係好離譜。
翟威廉仲要連個仔嘅幼稚園老師都調戲。
現為《流行都市》主持嘅彭慧中（Phoebe），2010年透過參選港姐入行，由於擁有修長美腿，係《流行都市》人氣主持之一。之前曾喺綜藝節目《吃貨橫掃曼谷》 坦言希望事業有所突破嘅 彭慧中，終憑《妳不是她》如願以償。彭慧中飾演人母維肖維妙，演活角色充滿心事及煩惱一面，大量喊戲場口處理得宜，獲網民盛讚演技自然討好，港姐出身嘅彭慧中，顏值與身形同樣獲網民點讚。
丁子朗同黃庭鋒呢個「背心雙煞」look笑咗。
翟威廉畀馬貫東佢哋大一大，即刻怒極暴走。
雖然彭慧中以往會偶爾拍劇，但佢直指敏兒係其入行以嚟最難忘角色，皆因多內心戲之餘，更有大量喊戲，對此彭慧中坦言壓力大：「其實以往每個角色都有獨特之處，但敏兒確係最難忘嘅角色，因為有幾個scene都係好重內心戲，所以係一個好好嘅挑戰。因為我始終拍劇經驗唔太多，所以壓力一定有，特別係面對大量喊戲嘅情況下。」彭慧中又感激拍檔馬貫東及監製支持及幫忙：「監製除咗同我討論角色同劇本，仲會幫我培養情緒同進入狀態，所以好多謝佢，佢係我嘅精神支柱。同埋有時我都會問我劇入面嘅老公（馬貫東），佢哋都畀到我好多支持同啟發。
「渣男」逼彭慧中借財仔，仲逼埋佢影裸照。
彭慧中呢套劇入面有唔少喊戲，而佢都演得恰到好處。
同樣表現突出嘅就係飾演極品渣男嘅翟威廉，喺劇中卑鄙無恥賤格嘅威廉，不但外型及舉止似足爛人，配以極度賴皮嘅對白以及猙獰面口，一出場即成功引起注意獲封「御用賤人」，更有網民直言有想打佢嘅衝動。
呢個商場追逐戰原來拍咗兩個通宵。
翟威廉話拍攝時，有意外誤傷馬貫東。
談到獲封「御用賤人」，威廉受訪時笑言好榮幸，坦認最近確係演多咗做反派：「尤其喺錢銀方面嘅賤格角色，計計埋埋做過成十幾廿次賤人吧！」威廉笑言絕唔介意演賤人：「做戲嚟講其實咩角色都有佢嘅獨特之處，人生百態，總有值得飾演嘅情節嘛！仲可以順便參透到所謂賤人嘅想法同因果關係，都係好好嘅體驗。」威廉續指商場追逐戰原來足足拍咗兩晚通宵，坦言拍攝期間意外打到馬貫東流鼻血：「拍呢場戲時我意外打中咗馬貫東，因為當時導演冇嗌Cut，所以我哋就繼續打，最後佢仲流鼻血，真係唔好意思。」
大團圓結局，Phoebe 真係幾靚女。
《妳不是她》逢周一至五晚八點半翡翠台播映
