身為廣告客戶寵兒嘅林盛斌Bob，呢日喺社交平台以長文分享自己「被代言」嘅經歷。阿Bob將自己「被代言」嘅廣告cap晒圖，喺帖文中表示：「可能市道真係唔好，多咗好多人出嚟搵食。其實我真係唔介意你哋正正經經搵我做代言人，影硬照同拍廣告嗰啲，我係絕對無任歡迎，價錢方面，豐儉由人，乜都有得傾嘅。但係你哋喺完全冇經過我同我公司嘅同意下，唔知係邊度攞咗幾張我嘅相走去用，我就真係覺得過分咗少少，唔係太好嘅。」
帖文入面阿Bob表示佢嘅經理人曾經聯絡過呢間公司了解事件，但係傾咗幾句對方就已經單方面cut線，所以佢先逼於無奈將呢件事放上網。阿Bob仲喺帖文入面同大家分析呢間公司有問題嘅地方，叫大家唔好上當。
阿Bob嘅帖文post出後冇耐，再喺限時動態跟進事件，佢話隨時事件曝光後，間公司嘅電話已經打唔通，而網頁亦撳唔到入去。
