50歲音樂人伍仲衡（伍Sir）去年喺音樂會向女友Ida（徐麗芬）求婚成功，一對新人於今午假香港嘉里酒店擺酒，噚晚伍仲衡率先喺社交網開Live大爆結婚細節，感激未婚妻Ida主力籌備婚禮事宜，排座位表日以繼夜咁改，佢對於Ida被指「肚凸凸」有喜，伍仲衡指得啖笑，「我先係凸肚嗰個嘛」。
一對新人喺圈中人緣不錯，許志安、蕭正楠、陳曉東、黎瑞恩、周國豐、張佳添、周吉佩、車婉婉、顏智恒、李佳、吳大強、曹敏寶、丁文俊、龍婷、支嚳儀、涂家堯、方力申、阮兆祥、王馨平、何嘉莉、Joey Tang、JW、鄭俊弘、何雁詩、向海嵐、林志美、肥媽及黑妹等好友到賀。
伍仲衡透露今晨喺社交平台透露Skip晒接新娘行程，皆因噚晚佢已跟未婚妻共住一房，而佢就以唱歌表演代替玩新郎環節，見佢深情望鏡頭獻唱周華健嘅《明天我要嫁給你》，一對新人下午率先一班兄弟姊妹團影相，下午4點開始進行斟茶及證婚儀式，兄弟團有布志綸、區永權、劉威煌、J Arie、謝國維，張翼東；而姊妹團則有吳業坤，其他則係太太好姊妹。據知《中年好聲音》參賽者涂家堯亦贊助今次一對新人、雙方父母及兄弟姊妹團嘅婚紗禮服。
