香港機場管理局全力協助，由陳耀全監製、黃偉強擔任編審嘅《飛常日誌》，由1月15號起、逢周一至五晚八點半翡翠台播映，「我哋要令每個嚟到機場嘅旅客，面帶笑容咁離開」，《飛常日誌》故事圍繞機場禁區內外每日接連發生嘅事，以戲劇手法帶出機場唔同部門員工點樣透過緊密合作，令所有旅客賓至如歸。
中央控制中心值班經理楊尚偉（馬國明飾）及見習行政人員方可兒（郭柏妍飾）負責監察整個機場運作，需要跟機管局其他唔同部門合作及協調，二人經常接觸機管局員工分別有機場客運服務經理呂芷珊（高海寧飾）、機場保安經理（行動）陳杰（洪永城飾）、機場飛行區運作經理李勝祥（徐榮飾）。
蔡思貝飾演嘅張若玲，則為航空公司駐機場主管，同時亦係楊尚偉前妻，喺公在私均與楊尚偉有緊密接觸；飾演空中服務員嘅劉穎鏇（Tiffany）及戴祖儀，同樣會圍住楊尚偉發生故事…
今日劇組發布官方造型照，蔡思貝、劉穎鏇及戴祖儀嘅黑絲空姐Look相繼曝光，擁有修長美腿嘅三人各有各美態，當中以高人一等嘅劉穎鏇最為搶焦，逆天長腿配以甜美腰果眼，令人眼前一亮。劉穎鏇受訪時坦言是次係首度喺劇集飾演空姐，並笑言曾一度被誤當係真空姐：「我之前唯一一次著空姐服就係拍《學是學非》，未曾試過咁Official梳好晒頭。最開心好多公司同事讚我好似空姐，喺機場都有人當咗我真係空姐咁。」蔡思貝與戴祖儀嘅空姐Look亦絕不輸蝕，前者以甜美取勝，後者喺劇中由於已升職，故主要以OL形象示人，而郭柏妍則長期以短打（短裙及短褲）出入，符合新鮮人身份。
男藝人代表方面，雖然馬明形象夠專業、徐榮夠多變，可惜依然未能匹敵朱仔朱敏瀚的「黑超機師」Look，喺劇中飾演情聖自然說服力爆燈。朱仔受訪時透露飾演機師係其加入無綫後嘅其中一個夢想：「因為細個有睇《衝上雲霄》，相信機師係每一個入TVB嘅演員其中一個夢想嘅角色，今次終於圓到夢。」朱仔笑指有向做機長嘅好友麥大力偷師，單係眼鏡及行李箱已充滿學問，譬如飛機師通常著咩衫、拎咩喼等，佢都有跟麥大力指引，希望呈現出嚟寫實啲。麥大力又教朱仔最緊要鎮定：「因為飛機師係負責保護乘客安全，所以一定要係最淡定嗰個，無論遇到咩危急情況，我都選擇用最Calm嘅狀態去應對。」
朱仔喺劇中與空姐戴祖儀有不少對手戲，談到首度合作嘅祖儀，朱仔笑指對方聲線「好刺耳」：「佢好開心嘅，聲線好響亮、有啲刺耳佢亦好貼近到角色嗰種巴渣，我哋劇入面都幾大對比。」根據官方宣傳照，朱仔與戴祖儀相當老友，祖儀趁朱仔補眠期間「偷襲」對方玩自拍，難怪朱仔笑言遭空姐祖儀「調戲」，十分爆笑。
《飛常日誌》逢周一至五晚八點半翡翠台播映