由 肥媽 李家鼎 同 游嘉欣主持嘅《肥媽李鼎打大佬》，星期三晚播出嘅第6集主題係「橫財必勝法」，肥媽同鼎爺細數圈中有橫財運唔錯嘅藝人，仲提到「小龍女」陳玉蓮曾多次中六合彩，鼎爺話：「佢做好多善事，呢啲叫行善積德。」又坦言自己冇橫財運：「我中過兩次獎，第一次中咗一圍酒，拔蘭地都蝕埋，第二次就大吉利是，我媽媽啱啱行咗，點知中咗一打毛巾(有排喊嘅意思)！」
入行多年嘅鼎爺又指覺得薛家燕係行運超人：「我做咗47年，有個人佢年年都有份抽到獎，佢就係薛家燕，不論大細佢都有嘅。」而肥媽就認為著名經理人陳淑芬同著名電影出品人向華強同樣有運，仲見證過向生喺賭城拉斯維加斯贏到一台名車。
之後佢哋又討論打牌睇人品，肥媽竟指唔會同張智霖打麻雀，不過原因就同人品無關，肥媽話：「佢牌品好到一流，一開就天胡，再嚟就十三么，唔係就嚦咕嚦咕，我話你傻㗎！邊個同你打呀，(佢)好好運㗎！」
然後又講到入馬場，游游笑言想正財橫財一樣掂，肥媽聞言笑言：「咁我帶你去馬場打個轉啦，帶你識叻哥(陳百祥)，包你贏馬！」肥媽仲大爆叻哥賭馬必勝秘訣！又笑指游游有嫁富二代嘅條件，不過就要先好好補腦喇：「嫁入豪門都有個特徵，就係唔會亂咁講嘢。」至於鼎爺除咗廚藝精湛，亦係圈中馬術高手；佢坦言已故資深演員兼馬評人董驃係自己偶像，又即場炮製「可樂燜豬手」悼念驃叔，更分享一段同驃叔相處嘅趣事。
《肥媽李鼎打大佬》逢星期一至三晚 22:30 翡翠台