以絕對科學嘅測驗，解讀人心嘅全新節目《窺心事》，透過小實驗同人生交叉式嘅故事，探討一啲大家想知，但又無從窺探、隱藏喺背後嘅人性，以人生交叉點式測試，為你解讀人心。
15集節目嘅主持陣容強勁，除一班J2ers外，仲有畢業於香港大學中文及犯罪學系嘅 黃子桐 同埋喺加拿大西門菲莎大學修讀心理系嘅 邵珮詩 助陣，加上客席主持註冊臨床心理學家 張傳義博士 同大家仍細拆解心理。
今個星期節目會同大家探討五大題目︰自私精、自制力、偽裝型、報復型同被腦控型。今晚播出嘅一集主題係「自制力」，由黃紫恩(Jojo)、邵珮詩同張傳義博士擔任主持，嘉賓請嚟譚焯升(Clevis)、涂毓麟(Oscar)以及馮子亮(Liam)。
同場仲加插「特派性感專員」Ashley，負責「色誘」三位男士。測試開始前三位男士閒聊、玩電話，當Ashley出現時即時引起Clevis留意，而其餘兩人就繼續打機，Ashley之後主動出擊同Clevis搭訕。
其後Jojo假借玩「老師話」遊戲邀請Ashley加入，一直喺遊戲中表現正常Clevis已完全落搭，專注力即刻下降，行動變慢且不時出錯。暗中觀察嘅邵珮詩同張傳義博士，仲發現Clevis不時偷望Ashley，特別係一齊掌上壓時情況最明顯。
事後張博士根據測試評定各人嘅自制力，結果Clevis嘅成績喺三人中最差，不過博士同時為Clevis平反︰「喺無干擾源嘅狀態下，佢嘅自制力、反應時間、速度同精確度係最好，可以攞最高5粒星。不過當『干擾』源(性感女Ashley)出現，制伏唔到誘惑，呢個情就得一粒星。」而同場嘅Oscar喺兩種情況下自制力表現最好，獲封「克制王」。
此外，邵珮詩提到一項美國史丹福「棉花糖實驗」，將一班小朋友放喺房間，面前放一粒棉花糖。小朋友被告知可以隨時享用，但假如忍耐15分鐘先食，就會額外獲多一粒作獎勵。
而成功忍到15分鐘嘅小朋友，被斷定喺考試嘅成績同自制性都較高。而自制力差會有咩反效果？張博士就指喺極端情況下，會做成物質濫用，例如吸毒或者跌落犯罪嘅陷阱。佢補充自制力係靠後天訓練去加強，節目中仲會教授兩招非常實用嘅訓練方法。
《窺心事》逢星期一至五晚 20:30 J2(82台)播映