為咗令連詩雅可以向觀眾展現佢嘅「多樣性」，監製阿細葉鎮輝為佢打造多個不同造型，當中包括主要嘅斯文OL Look，學生妹造型、清爽居家服等，而三大日常造型入面，以學生妹Look最為亮眼，着起短裙仔演學生妹嘅連詩雅完全零違和，一對大長腿更加係相當吸睛。另外阿細還為連詩雅打造了「野人服」，狂野裝扮配襯清純嘅連詩雅，效果特別。
而同連詩雅有大量對手戲嘅羅天宇，今次喺造型上同樣有突破。為咗演活「軟弱社恐學生哥」同「強逼症警察」，阿細分別為天宇打造了「薯Look齊蔭」及「堅挺All Back」兩大髮型，令天宇看上去截然不同。而為咗演活軟弱學生哥，天宇更不惜以近乎絕食嘅狀態極速減磅，希望呈現瘦弱嘅感覺：「監製開劇時已經話唔可以太大隻、要減多啲肥，感覺要弱啲。過去幾個月我都冇健身，每日都食菜同雞肉，已經幾個月冇食Pizza。」
連詩雅同天宇一齊接受訪問時，佢證實對方真係「冇啖好食」，仲話喺天宇面前食嘢令佢超有罪惡感，而天宇亦趁機「投訴」連詩雅，佢話：「有場講我哋爭嘢，佢一嘢就將我推咗去好遠。」至於講到劇中遭集體欺凌戲份，天宇坦言拍攝時因太代入感覺難受：「都幾唔好受，因為真係兩個人各撳一邊，再有人撳住我對腳，完全冇反抗之力。」
另外，9號晚播出嘅一集，周柏豪喺「黃金雨」樹下主動向王敏奕獻吻示愛一幕，被讚拍得浪漫唯美。
除咗同王敏奕嘅吻戲外，柏豪同吳若希亦有一場好有記憶點嘅熱吻戲，除咗因為吳若希嘅火紅裝束夠搶眼外，劇組精心安排嘅「濕水之吻」亦應記一功！為營造浪漫感，劇組拍攝時從低處向二人瘋狂射水，吳若希與柏豪不但被射至頭髮滴水，柏豪嘅眼鏡、吳若希嘅火紅裝束更成為重災區；根據官方發布嘅花絮短片，吳若希拍攝期間一度凍至打冷震，拍完仲瘋狂大叫好凍，相當慘豬。
《旁觀者》逢星期一至五 21:30 翡翠台