TVB熱播劇《妳不是她》噚晚（11號）播出嘅一集收錄咗全劇最大嘅彩蛋，就係馬國明驚喜登場，飾演的士司機「馬明」嘅佢，劇中主要任務係同林善（車婉婉飾）發展姊弟戀。
搞笑嘅係，現實中升呢人夫無耐嘅馬國明，喺劇中自稱單身兼性格「好鬼悶」之餘，仲大談擇偶條件同兩性相處之道：「做女人唔使成日都咁Tough，唔使吓吓都死頂，間唔中流露番少少女性溫柔，需要膊頭咪開聲咯。好多男人見到太強嘅女人，佢哋就縮唔敢追架喇」、「唔係每個男人都鍾意小鳥依人嘅，我就唔鍾意湊女喇，我鍾意啲女人係成熟啲，有自信啲，兩個人相處最緊要夾唔夾。」
齋睇表面證供，馬國明繼《新聞女王》後，再喺《妳不是她》中同婉婉正面交鋒好似甚有淵緣，原來佢哋緣份早喺23年前經已開始，近排忙於演唱會綵排嘅婉婉，透露原來同馬國明喺2001年拍攝《不必剎掣》MV時已經首度合作，當年佢哋除咗飾演情侶，馬國明亦巧合地喺MV中飾演司機，點知相隔23年再度「同車」，可謂別具意義；婉婉更對昔日嘅拍檔近乎有讚冇彈，笑指當年嘅馬國明可以「全日唔講嘢」：「我同馬明都真係有特別緣份，當時拍嗰隻MV時，我覺得呢個男演員好斯文，全日冇講過嘢，全日呀吓，拍咗一日架！同埋佢又高啦，樣又靚仔，身形又好，所以我對佢有好深刻印象。後尾佢愈嚟愈紅，我就發現佢原來都幾活潑同幾好笑，但已經冇機會再合作。估唔到一直去到最近，又突然連續同佢有番合作，仲有對手戲添，所以好開心，好有親切感。」
據知馬國明是次答應客串馬明一角，全因為了支持新進監製April，更是百忙中抽出空檔拍攝，絕對是有情有義代表。其實April與馬明亦相當有緣，二人先後於《白色強人》系列及《降魔的2.0》中合作過。
《妳不是她》今晚8:30翡翠台播大結局