近年定居喺馬來西亞嘅馮寶寶，最近返咗嚟香港探朋友，呢晚佢仲去欣賞彭美施嘅粵劇作品系列新《梁祝》，同場嚟欣賞嘅仲有向來提攜粵劇後輩嘅阿姐汪明荃。曾經喺劇集《楊門女將》入面，反串飾演汪明荃兒子嘅馮寶寶，難得「母子」重聚，馮寶寶一見到阿姐就就即刻攬住對方唔鬆手，仲大叫：「我同娘親失散咗好多年喇！」
新《梁祝》嘅藝術總監吳美英，喺謝幕時大讚梁兆明同梁非同，指佢哋將梁祝痴愛嘅感覺演繹淋漓盡致，令觀眾都感受到佢哋嘅痛苦與傷心。而施姐就覺得新《梁祝》今次重演是更上一層樓，當聽到梁兆明話希望新《梁祝》可以繼續重演時，施姐就好有信心咁應承對方，仲話唔排除有機會會衝出香港呀！
謝幕時美英姐亦邀咗青梅竹馬嘅好朋友馮寶寶上台，講到今次睇劇嘅感受，馮寶寶話自己喺檳城時已經聽朋友講新《梁祝》好好睇，佢話：「看過之後真係名不虛傳，好開心可以看到，特別感到震撼是化蝶一幕，好浪漫，投影好靚，好像有好多螢火蟲，好似當我離開嘅時候，就會去到這個地方。」
向來要求高嘅阿姐，喺演出同馮寶寶一齊去到後台，阿姐大讚新《梁祝》有新意，同時兩位主角嘅演出亦好落力：「今次用咗唔少新元素，化蝶一幕很多蝴蝶由舞台飛出來，耳目一新，講到新《梁祝》最深刻嘅地方就係感覺好年青、好靚，真係青春無敵！」馮寶寶就表示開場時書院一幕令佢相當驚喜，同時亦戥兩位主角開心：「他們應該覺得好幸福，這生能夠遇上特別為他們而創新的好作品。」
原來花旦梁非同係馮寶寶嘅超級粉絲，知道偶像嚟欣賞演出時既緊張又興奮，佢仲喺網上平台搜羅到一本寶寶姐演出歷程珍藏本，又好似數家珍咁數出寶寶姐嘅演出，令馮寶寶笑言：「原來我活到現在，就是等妳這位小粉絲。」
另外，梅小青呢晚亦着上一身蝴蝶裝嚟捧場，令佢成為集郵對象，而上次錯過新《梁祝》首演嘅黎燕珊，呢晚亦有嚟捧場，珊姐話見到主角聲淚俱下，佢都為之動容呀。
