由 周柏豪 同 王敏奕Venus 主演嘅劇集《旁觀者》，唔只女主角嘅高敏族身份打開大家對呢個族群嘅認知，拍攝手法亦同傳統港劇非常唔同，演員拍起嚟都係擦新自己嘅新領域一樣。
好似呢日柏豪、Venus同吳瑞庭等拍攝殺人場口同追逐戲份咁，Venus透露拍攝時好多時都係冇對白，好似呢日從半夜12點開始拍到清晨嘅6點，六個鐘都拍攝啲追逐同反應畫面，好靠導演同攝影師點營造要表達嘅內容，因為劇情講Venus仲未知道柏豪連環殺手嘅身份，所以連眼神嘅交流都冇，只能夠靠扯衫尾等小動作來表達，佢都話相當有難度。
Venus亦大讚柏豪相當專業親身演繹追逐戲份:「其實佢由頭包到落腳，唔駛佢親身落場俾我追都可以，佢真係相當專業。」而柏豪就講笑話:「睇吓你(王敏奕)本時表現點啦? 表現好嘅話我就跑慢啲，否則我就踩行油。」雖然Venus對自己體能好有信心，但係佢都話柏豪只係講吓笑，平日都係一個暖男好照顧拍檔。
