由張敬軒自資、一連兩場招呼逾萬名歌迷嘅張敬軒官方歌迷（HCFC）生日會於1月14號喺澳門舉行，大會搵嚟軒仔契家姐胡蓓蔚及商台DJ阿正擔任MC。生日會一開始播放出HCFC最新會歌、由軒仔作曲嘅《以你命名的恆星》作為生日會序幕，由於歌曲係專屬於官方歌迷會嘅年度禮物中，所以歌曲唔會派台、唔會公開聽到。
歌曲播放完後，軒仔坐喺飛船升上高空跟歌迷打招呼，而佢特別揀選《隔夜茶》、《假以時日》及《飄洋過海來看你》三首甚少唱嘅歌來送畀歌迷，以答謝從唔同城市嘅人來睇佢。另外，軒仔得知好多歌迷未能去現場跟佢慶祝生日，所以佢特別自費，安排網上會員嘅限定直播，令所有官方歌迷會會員能夠收睇噚日生日會。
生日會主題係「軒公生日 你哋大晒」，雖然呢個軒仔嘅生日會，其實係佢氹過萬名嘅歌迷開心，歌迷收到呢份心意後，自發拍好多生日片，並於會場內播放，不過對於一啲歌迷「別開新面」嘅祝福，經常「恥笑」fans嘅軒仔又忍唔住「奚落」佢哋一番，連佢契家姐胡蓓蔚都忍唔住話佢「賤嘴」，全場歌迷歡呼表示贊同，十分搞笑。現場除咗播生日片，場內又播出歌迷於今年「叱咤樂壇頒獎禮」場內場外為軒仔應援片段，剪輯一眾歌迷向軒仔送上生日祝福嘅短片，睇到片段後，軒仔覺得好感動：「叱咤嗰晚因為唔係個個都有飛，見到佢哋揸住Tablet、電話，冒着寒風睇張敬軒有冇攞獎，原來佢哋喺出面係咁睇show，所以我啱啱都眼濕濕……頂唔順。」
好友林家謙、陳卓賢（Ian）、Tyson Yoshi及魏浚笙（Jeffrey）亦有拍片向軒仔送上祝福，又分享與軒仔間嘅小趣事，例如跟Jeffrey拍電影時，鬚根無故生出嚟，Jeffrey大讚軒仔特別留意生活上小細節，「有一日佢話『積肥，買咗個新鬚刨畀你，我覺得係最好用』，軒公教識咗我哋乜嘢係施比受更有福。」Tyson Yoshi形容軒仔係黐線佬：「感激認識軒公呢幾年，喺無數個公關災難出現前拯救咗我好多次，呢個『黐線佬』好鍾意派錢，每次開工都塞利是畀我，感謝你咁take care我，無論係工作上或日常生活上，希望有一日我有足夠強大可以take care番你，而家呢一刻就難啲，我會努力。」
林家謙對着軒仔絕對係嘴上不饒人，林家謙繼續寸嘴：「你又再次告別你嘅青春啦，同恭喜你又遠離我一歲啦，哈哈。我想送個創作人獎畀你，因為聽講你走數多年，希望你新一年盡快找晒啲街數。」軒仔睇嗰陣大叫佢收聲，十分搞笑。
入場歌迷更經過悉心打扮，而且大部分以水果裝扮為主，包括榴槤、菠蘿、火龍果、蕉、西瓜、橙、牛油果、西蘭花等，軒仔即時搞一個「最佳衣着獎」，最後挑選幾個「水果」坐喺最前位置欣賞演出，其中一隻「香蕉仔」更向軒仔送上生日利是，之後軒仔同歌迷玩遊戲，隨後，大會抽出10位歌迷跟有外號「皇上」嘅軒仔玩「爭櫈仔」遊戲，十位歌迷全部帶上「清朝旗頭」，搖身一變成為「妃子」，一眾妃子各有特色，軒仔又忍唔住話：「大家有冇睇過真實清朝啲妃子啲樣？佢哋就係咁㗎啦。」引得全場大笑，有歌迷喺兩位MC提水下，乘機與軒仔坐同一張櫈，十分sweet。
軒仔直言從小到大都唔喜歡過生日，主要係唔想畀反應，但今年好特別，歌迷會於疫情期間成立，佢覺得呢幾年冇太多機會跟大家見面，一路搵緊啱嘅時間，所以膽粗粗請大家嚟。雖然今次話係免費入場，但佢知道大家舟車勞頓有啲朋友仲要買禮物及造燈牌，佢趁住呢個birthday party多謝大家，希望將自己生日會變成一個更有意義的聚會。
軒仔坦言呢十年經歷咗好多：「入咗行咁多年經歷咁多代嘅歌手，由我同年嘅吳浩康，一路到當我哋仲係細蚊仔嘅時候第一排係陳奕迅、李克勤、古巨基；到同我同輩嘅方大同、張繼聰；到我嘅後輩側田、周柏豪、陳柏宇；到而家嘅陳卓賢、林家謙等，每一代歌手我同佢哋都係competitor，但我發現我從來冇因為攞唔到獎而唔開心，或者因為對方攞到獎而妒忌。由細到大我覺得我阿媽教得我最舒服嗰樣嘢就係我好識得去為人哋開心。所以大家不妨改變你嘅信念，試吓改變你對呢啲事情嘅反應，試吓開始將『共贏』呢兩個字放入你嘅社交入面，好多時都做到㗎。」最後，整個生日會以歌迷會的第一首會歌《懷舊情人》作結。