新劇《飛常日誌》噚晚（16號）播出第2集，最大亮點當然係《中年好聲音》嘅Bill哥哥吳大強客串演出喇。Bill哥哥喺劇中飾演患有失智症嘅福伯，劇情講到佢想坐飛機去加拿大出席仔仔嘅畢業典禮，但係喺櫃位辦理登機手續時一度遺失證件，又講到自己之前喺九龍城坐飛機，呢番對話令航空公司駐機場主管若玲( 蔡思貝 飾)覺得有啲蹺蹊，最後仲發現福伯原來係機場飛行區運作經理勝祥( 徐榮 飾)嘅爸爸。
由於病情嚴重，福伯已經唔認得勝祥係自己既囝囝之餘，仲記錯佢仲喺加拿大讀書，福伯對勝祥講：「我應承咗個仔要睇佢戴四方帽，今日唔去就趕唔切。」面對失智爸爸，勝祥壓抑傷感和藹咁話：「你個仔畢業咗好耐，我叫李勝祥，我係你個仔呀，阿爸」、「你唔記得我唔緊要，我會提你，不過你要記住去邊都要同我講聲呀。」最後父子喺黃昏美景下齊齊望着飛機升降，場面感人。
作為演戲初哥嘅Bill哥哥，演繹失智老人表現合格，仲獲監製 陳耀全 大讚記對白一流，大部份鏡頭近乎一Take過完成。對於有份客串《飛常》，Bill哥哥話既興奮又開心：「因為可以去到機場禁區入面拍攝，平時好少機會去，呢個經驗好難得；心情都會有啲緊張，因為拍劇我始終都係新手，又要講對白，表情又要做到足，係有啲難度。」
提到獲監製大讚，Bill哥哥謙稱：「非常多謝監製對我嘅信任，Andy比較客氣啫，其實都有啲NG情況發生，同埋大家都好遷就我，個個都好有耐性，真係好多謝大家。」Bill哥哥仲特別感謝「哎吔阿仔」徐榮：「佢都幫咗我好多，好希望有機會再做多次佢老竇！」
Bill哥哥又預告喺劇中將會同真．囝囝 吳偉豪 再次有對手戲：「同個仔拍劇感覺好特別，喺佢面前演戲感覺就踏實啲，就算我有咩做錯，佢都唔會畀面色我睇，我諗佢都唔敢嘅，同埋佢都幫咗我好多，好帶到我入戲。」
Bill哥哥更自爆連串蝦碌事件：「有次我好早去到現場，但見唔到其他拍劇同事，原來我去錯咗地方，大家其實喺正確嘅地方等緊我。」Bill哥哥續指有次更因為遺失禁區證險要報警收場，幸好吳偉豪同爸爸「心有靈犀」，即時回想事件來龍去脈、拯救咗Bill哥哥，Bill哥哥話：「嗰次好失魂咁唔見咗張證，搵極都搵唔到，去到最後畀個仔搵到，原來張證跌咗去我隻襪入面，呢個真係千古奇聞，好彩最後都搵得返，冇影響到拍攝進度！」
《飛常日誌》逢星期一至五晚 20:30 翡翠台