35歲梁洛施（Isabella）雖然成為人母，但臉上全無歲月痕跡，經常被讚「逆齡」生長，最近佢為一個護膚品拍攝廣告大談保養心得，形容眼睛係靈魂之窗，作為好演員更需要透過眼睛表達情感，雙眼必須時刻保持神采飛揚，平時特別注重眼部護膚。
對於品牌於5年後再度邀請合作，Isabella坦言時光飛逝，呢5年來嘅累積嘅經歷及磨練，令佢成長不少，硺磨出不論個性或生活更為立體嘅自己。祈望未來演藝事業能夠突破自我框架，繼續綻放耀眼嘅光芒，Isabella近年開始活躍幕前，喺電影《爆裂點》表現亮眼。
講到「梁洛施」呢個名，大眾對佢印象普遍係「李澤楷前度」、「母憑子貴」。當年Isabella同李澤楷嘅戀情喺2008年曝光，翌年誕下大仔長治，之後再為對方誕下一對雙胞胎，最終二人喺2011年宣布分手。最近Isabella接受內地主持人魯豫訪問，難得開口分享自己成長經歷及跟李澤楷呢一段情。
Isabella直認自己係戀愛腦，當時連媽咪出聲提醒，自己都聽唔入耳，只認為對方係一生最愛。即使外界聲音複雜、即使對方非常富有，但自己只係愛佢。Isabella曾經想像會同對方結婚，只係一切冇得強求，對方亦太受女人歡迎，自己想活得有底氣一啲，所以最終結束呢後戀情。不過Isabella走出情傷嘅時間亦唔短，一直等到2018年先認為自己完全走出傷痛。
不過回望過去，Isabella就認為就算可以再揀多次，佢仍然會行同樣嘅路，成為人母係人生寶貴經歷，佢自認係嚴母，對小朋友教育嚴格，屋企就好似一個宿舍一樣。但當兒子有欣賞過佢出演嘅《爆裂點》，仲同佢講「媽媽，如果你沒有我們，你事業會很好」， Isabella聽畢回應阿仔︰「媽媽的選擇沒有後悔。」