新鮮出爐《萬千星輝獎典禮2023》奪「最佳女主持」嘅麥美恩（Mayanne）噚晚帶同獎座接受電台錄音訪問，佢大談得獎感受，主持人薛家燕、范振鋒及思敏祝賀麥美恩。
家燕姐曾同麥美恩喺TVB劇《黃金萬両》合作，劇中「婆媳」大鬥法，家燕姐得知「新抱」得獎都好開心，仲讚麥美恩係實至名歸，希望對方越做越好。 
麥美恩坦言當晚得獎感言係早有準備，幾年前得到「飛躍進步女藝員」，佢得到經驗係唔好講得太急，最重要係講得清淅，好好享受嗰個時刻，至於「最佳男主持」獎，麥美恩貼中好友周奕瑋，對方講得獎感言時自己忍唔住眼濕濕。由於下一個獎就係頒女主持，同樣獲提名嘅黃翠如就提佢忍住唔好喊，令佢感到好温馨。
問到會否想緋聞男友許文軒（Edmond）得獎多啲？麥美恩笑指自己同周奕偉開咗條路，Edmond明年攞會更實至名歸，因為今年太明顯，麥美恩坦言：「周奕偉值啲，有我們幫忙助力，我有信心佢明年至少入到5強，希望明年可以讀『實至名歸』呢幾個字畀佢。」麥美恩更唔介意親手頒獎畀許文軒，大讚係好有綽頭。
被問下一個目標係咪想向女一方向發展？麥美恩聞言即哈哈大笑：「我下個目標挑戰吳若希，我要做佢女配角，佢一姐嘛！如果配吳若希我可以屈就少少，其他我就要爭做女一！哈哈！」麥美恩坦言女一之路好遙遠，睇到佘詩曼奪三獎，真係好欣賞。 另外，思敏噚晚向家燕姐送上一本相簿，收集家燕姐喺新城廣播工作多年嘅照片，當中仲有家燕姐跟已故霑叔嘅珍貴照片。家燕姐表示喺新城廣播工作超過20年，每一個時段都好開心，最緊張就係疫情時期，當時好多時都係透過ZOOM做節目。
