由 孔德賢 謝東閔 陳嘉慧 黃嘉樂 韋家雄 李成昌 樊亦敏 甄采浠 黎燕珊 同 區明妙 等 主演嘅新劇《本尊就位》，29號晚就會同大家見面。
呢部臨近歲晚推出嘅民初輕鬆小品式喜劇，由上位新人孔德賢同陳嘉慧擔正男、女主角，而「御用衰人」 謝東閔將「洗底」，飾演善心兼戇直無極限嘅神仙呂洞賓。劇情講述借神仙呂洞賓之名騙取善信金錢嘅陳木昆( 孔德賢 飾)，因負評太多觸怒呂洞賓本尊下凡算帳，可惜途中又殺出「尋仇吼天犬」，令呂洞賓滯留民間。
原來呂洞賓同木昆之間有一段「宿世孽緣」，當年因呂洞賓對年少木昆不聞不問、釀成悲劇令 木昆走上歪路，及後呂洞賓發現「被下凡」除咗要化解呢段恩怨，仲要同木昆一齊成長
今次係謝東閔拍劇接近14年來，繼《黯夜守護者》嘅Big Boss、《你好，我的大夫》衰格偷食老公，同《旁觀者》嘅加害者三大奸角演出，被外間封為「御用衰人」之後嘅「洗底」作。Brian唔止告別衰格飾演好神仙，仲係反應慢半拍又帶天然呆，喜感十足。
講到要扮演神仙呂洞賓，Brian指最大難題之一就係髮型：「監製想我兩個造型嘅頭髮都長返少少，所以兩個造型都有加假髮。因為拍嗰陣都幾熱，又要戴頭套又要黐鬚，都幾辛苦吓。」
新劇亦將民間典故玩出無限創意，好似「尋仇吼天犬」橋段便源自民間典故「狗咬呂洞賓，不識好人心」。因為呢個典故令 吼天犬被蒙上「惡犬」污名，心有不甘嘅吼天犬遂將矛頭指向呂洞賓毁其清譽，引發「神狗大戰」，呂洞賓更仲搞到法力盡失。
Brian談到相關場面就透露，要同空氣對打非常難忘：「主要係同空氣對打，好似拍緊超級英雄電影 咁。加埋第一次吊威吔吊到咁高，去到廠個頂咁滯，仲要吊足成晚，加上本身我有少少畏高，所以都幾驚。」
而首度升呢男一嘅孔德賢，坦言收到角色時「唔識反應」：「第一吓真係唔識反應，好感恩公司畀呢個機會我。之後成個拍攝過程我都好開心、好期待，同自己講要盡最大努力去做。之前兩、三年拍劇都係同同輩演員對戲，今次接觸好多前輩，佢哋教我咩叫敬業樂業，就係無論喺邊個崗位，都要發揮自己最大嘅努力。」
為演好男一，Danny連「瞓覺都攬住劇本」，仲一個月瘦足7.5公斤：「我本身都唔肥，嗰排真係生理同心理都好大挑戰，我知演技一定未夠班，所以只能更加努力。我每日都攬住劇本瞓覺，每日起身都一邊擦牙一邊重溫劇本。」
Danny仲話好開心近期推出嘅三部作品《你好，我的大夫》、《新聞女王》同《本尊就位》，扮演三個性格大不同嘅角色，認為咁樣可以帶俾觀眾新鮮感。 今次Danny同Brian合作更充滿火花，劇內鬥嘴鬥智又鬥力，針鋒相對的同時又會偶爾並肩作戰，關係耐人尋味。
至於戲外，兩人同樣經常並肩作戰打足球Game，建立非常好默契，加上拍劇時日見夜見，Brian笑言對到想嘔：「大家可以話每日都喺埋一齊，係好愉快，但有時真係對到想嘔，嗰陣 屋企人同朋友完全冇時間見。我哋熟到有時爭一場、半場，都會等埋一齊收工。」Danny仲透露當正Brian係哥哥，又感激對方教識自己唔少嘢，Danny話：「佢好正，諗嘢好通透又好有經驗，又好了解我，好明白我依家階段面對緊咩問題，教識我好多嘢。」
《本尊就位》1月29號起 逢星期一至五晚 20:30 翡翠台