J2又有新節目喇！22號晚將會首播由廖慧儀Jessica同甜品師黎紀君Christy主持嘅《網紅甜卡》，節目入面佢哋將會帶大家嚟到甜品天堂歐洲，走訪最著名嘅甜品店及網紅打卡點，實行又食又影。
每次兩位美女主持出發去打卡前，都會由造型師李慧茵Veronica操刀為佢哋設計造型，嚟當地 嘅salon扮靚，甚至會自製埋香水，務求以最完美一面去打張靚卡。今個星期會重點去食同學整馬卡龍、曲奇餅、牛角包，拍攝隊將會走訪法國最古老嘅甜品店，品嚐招牌嘅Rum Baba蛋糕，亦會去到劇集《Emily in Paris》嘅拍攝場地朝聖。
Christy同Jessica一落機就急不及待要食有「少女的酥胸」之稱嘅甜品macaron(馬卡龍)，Jessica仲抵死拉開外套曬胸配合，即時畀身旁嘅Christy制止。之復Christy同大家解釋macaron名稱嘅由來：「因為有法國人話一個好味嘅macaron，要有一個又薄又脆嘅外殼，加上軟綿綿同少少黐牙嘅口感，好似少女嘅酥胸一樣。」
今次佢哋介紹嘅Richart馬卡龍店於1925年創立，前身係一間朱古力工廠，目前由家族第三代人Gautier 打理，售賣朱古力同25種唔同口味嘅馬卡龍。Christy同Jessica自然唔會執輸，一口氣試咗當中16款口味。
作為甜品師嘅Christy嚟到巴黎自然要自肥一番，佢報讀由老佛爺百貨開辦嘅馬卡龍製作班。課堂上 Christy 戴上圍裙即進入工作mode，可惜因為太過興奮而做漏工序被導師訓斥，最黎完成咗 4 粒馬卡龍。另一邊嘅Jessica就花咗 30 歐元(約 256 港元)喺老佛爺百貨買咗 8 粒、被喻為天花板級嘅馬卡龍。唔講唔知老佛爺百貨嘅頂樓係網紅打卡必到處，因為可以飽覽整個巴黎，遠眺鐵塔及歌劇院，所以每到日落黃昏都擠滿遊客。
此外，J2 82台黃金時段節目喺22號起將作新安排，逢星期一至五 20:30，推出全新旅遊節目《網紅甜卡》，21:30 會有陸浩明 6號、名廚楊尚友Christian主持嘅全新飲食綜藝節目《不如食豪 D》，每集會邀請藝人、名人擔任嘉賓。第一集打頭陣出場嘅係歌手曾比特。而劇集方面星期一至五 22:30 將會播映韓劇《紅色高踭鞋》。
至於《開卷》、《關注關注組》、《玲玲友情報》、《不正常愛情研究所》4 個長壽節目，播映時間亦有調動，逢星期一至四 22:00 播映。熱播中嘅《古靈精怪 台灣篇》，由過往一星期播映 5 集，改為逢星期五 22:00 播出。