星光路上丨蔡國威暢談低潮期辛酸哭成淚人 遺憾無法與父親分享捱出頭嘅喜悅

入行28年嘅蔡國威自細已想入娛樂圈工作，佢近日接受TVB娛樂新聞台節目《星光路上》訪問與主播潘盈慧暢談低潮期辛酸，蔡國威笑指細個覺得自己OK靚仔，又唱得吓，估計自己做到歌手，毅然決定參加一個歌唱比賽，當時成功入總決賽，蔡國威本以為有機會，點知最終無緣攞獎，更不獲簽約機會，佢重回銀行工作，直到兩年後，考入舊公司嘅訓練班，正式簽約做藝人，後來佢轉投TVB。

蔡國威一開始抱著做新人嘅態度去學習，決定由頭嚟過，由於大家對佢未必認識咁深，蔡國威坦言當時冇咁多工作量，承認有一段低潮期，佢直言有幾次曾萌生想轉行，蔡國威開咗一間舖頭賣餅，當時開店後卻有一個機會拍《包青天再起風雲》，佢決定畀多一次機會自己做演員，之後冇再做生意；蔡國威好開心拍呢套劇令觀眾印象深刻，後來佢喺《靈戲逼人》做衰老竇，令觀眾有驚喜。

蔡國威同樣好鍾意做司儀，曾參加《全能司儀大賽》拎冠軍，令佢感覺獲得好大肯定，終於捱出頭，蔡國威嗰陣第一時間諗起爸爸，頓時哭成淚人，蔡國威回想自己搵錢又唔多，又畀唔到錢屋企人，喺隔籬台又被睇低一線，蔡國威好可惜係爸爸走咗，唔可以再分享呢個喜悅。