電子音樂活動《SUMMIT GALA x THE BATTLES II》日前喺亞洲博覽館舉行，除咗一眾素人參賽者外，有「電音王」之稱嘅DJ Sidtrus同旗下合約歌手Jon同Ida亦有上台演出。雖然電音唔係香港樂壇主流音樂︳但係依然吸引過三千觀眾入場欣賞。
擅於搞氣氛嘅電音王Sidtrus，當日嘅演出掀起高潮，特別係當佢同Jon演繹由佢作曲嘅網絡爆紅歌曲《Take Me Home》，現場觀眾紛紛跟住唱，反應熱烈。
對於「電音王」稱號，Sidtrus謙虛話：「冇話王唔王，我嘅角色係DJ表演者，帶歡樂畀大家係我要做嘅嘢，（會否增加壓力？）有壓力係好事，有壓力先可以做得更加好，呢種係正面嘅壓力。我最要多謝老闆Sherman畀足信任及信心我去搞電子音樂，出心出力將音樂推動，更加幫好多有潛質音樂人創造機會。」
由Sidtrus作曲Jon主唱嘅NFT單曲《Take Me Home》，喺2021年12月推出後，即獲得接近三百萬港元銷售額，並獲得亞洲最高音樂NFT銷售額前五名以及香港DJ音樂NFT專輯單曲最高銷量紀錄，對於如此佳績，Jon表示聽到消息時好驚訝：「我記得當時瞓醒覺，然後睇Whatsapp 有恭喜留言，我係唔敢相信，因為一個素人可以做到咁，覺得我哋成個team好犀利，咁啱遇到Sidtrus作到咁好嘅歌，又畀機會自己唱，真係超級開心，超級驚訝，完全冇諗過。」問到喜歡的歌手，Jon表示以前好鍾意聽張敬軒同陳奕迅嘅歌，最近則好喜歡MC張天賦，希望有機會同MＣ合作。
