姚焯菲Chantel呢日去到新城接受錄音訪問，由於節目主持程凱欣Karen剛升任為新城廣播知訊台台長，故Chantel特意為對方送上鮮花祝賀。
對於新歌《初心小島》MV上載咗一個星期，已經有近60萬點擊，Chantel表示相當開心，講到佢嘅初心，Chantel就話自己心情好矛盾：「感覺距離自己愈來愈遠，就快踏入大人18歲階段，好多責任需要負擔，知道時間唔會返轉頭，好期待成為大人，又好想快啲逃避讀書嘅時間，但又覺得好怕長大，明白成為大人後有好多責任。希望可以藉住新歌提醒自己嘅初心同珍惜無憂無慮嘅感覺。」
訪問入面Karen讚Chantel對唱歌好有要求，問到佢如果要諮詢音樂上意見，會揀問爸爸定係音樂監製蘇道哲？Chantel秒答一定係問監製，因為咁樣先你專業對口呀！
完成新歌宣傳後，Chantel即將就要返去紐西蘭繼續學業，雖然仲未正式離開，但Chantel話自己已開始唔捨得香港同家人，擔心返到紐西蘭會思鄉呀。
