由張達明飾演宋世傑同郭藹明飾演白玲瓏嘅經典劇集《狀王宋世傑》，當年播出嘅時候叫好又叫座，而29號首播嘅《狀王之王》，正係《狀王宋世傑》嘅前傳，而今次嘅宋世傑同玲瓏嘅角色，則換上王浩信及姚子羚飾演，張達明則升呢演宋世傑養父宋安，唔只對宋世傑有重要嘅影響，佢仲係呢套劇嘅監製！
講到相隔多年再度參演以宋世傑為主嘅劇集，仲多咗個監製身份，張達明坦言要顧多咗好多嘢：「今次角色最唔同係好多特別嘅造型同化妝，係超乎想像嘅。以前演宋世傑時話晒自己第一 次做劇集主角，所以要顧掂自己啲台辭同演法先，冇乜點理其他嘢。今次做監製最大分別就係要顧好多嘢，由拍攝方法、搵演員、演員配搭等都要處理，希望可以創造出新嘅經典組合。」
講到新任宋世傑王浩信，達明對佢讚不絕口：「佢好稱職，演技好、夠投入同想像力好豐富，我同佢都去過外國上演技深造班架。佢好多動作都比我強，因為夠高大。呢套劇我主要教佢點玩把扇，其實以前我都唔係專登為咗宋世傑個角色去學玩扇，而係咁啱喺演藝學院學咗一啲京劇嘅技能，就將學咗嘅嘢融入個角色度。 而我教完浩信後，佢即刻諗到點用自己嘅方法去玩，仲要好『估你唔到』嘅。」達明又指新版同舊版最大分別，就係王浩信比自己高大靚仔同威猛好多，但佢保證新版保留咗唔少舊版可觀元素：「第一姚子羚同郭藹明一樣咁靚同咁打得！宋世傑同玲瓏都係會攜手查案同有好多奇遇，佢哋會全力以赴打破困局、搵出佢哋想知嘅真相。」
喺近日接連推出嘅官方宣傳片，其中一條宋世傑喺玲瓏(姚子羚飾)、宋九 (金剛飾)、小鳳(王子涵飾)同劇中「龍虎豹」三人組周百恩、蔡尚晉及宋懿芳嘅陪襯下，以經典廣告歌為襯底，大跳娘味濃嘅「宋世傑硬銷舞」。佢哋除咗要忍笑喺鏡頭前載歌載舞、仲要連番做出「拱照」宋世傑嘅動作， 至於全程企C位嘅王浩信，則拋開身份唔啱音咁唱出：「宋世傑，冇得頂，好似太陽咁溫暖，畀人老屈不要驚，世傑出馬，好似雪人融化了！」爆笑度十足。
同舊版一樣，《狀王之王》以破案為主，除咗主線故事發展吸引，五個單元故事個案同樣具追看性，分別係「蜘蛛精殺人案」、「幽靈新娘案」、「滅門縱火案」、「至尊計狀元才」及「使節姦殺案」。單元主角更係齊集好戲之人及綠葉演員，包括古明華、陳浩民、海俊傑、彭迪安(前名彭懷安)、袁潔儀、文凱玲、李嘉、鄧伊婷及莫家淦等。五大單元個案由宋世傑、玲瓏、宋九及小鳳組成嘅「查案鐵四角」負責調查，四人為了破案奇招盡出。想一睹王浩信與姚子羚拋開偶包喺農曆年間放笑彈，密切留意《狀王之王》。
《狀王之王》29號起 逢星期一至五 21:30 翡翠台
