由 孔德賢 謝東閔 陳嘉慧 甄采浠 韋家雄 李成昌 樊亦敏 黎燕珊 黃嘉樂 及 區明妙 等主演嘅新劇《本尊就位》今晚首播。劇集內容以神仙配神棍再加入人仙愛情為題，除了幾位年輕主角孔德賢、謝東閔及陳嘉慧之外，仲有多位好戲緣葉加持，好似入行16年嘅甄采浠（Carisa），終於攀升主演之列，今次飾演妓院「溫香玉院」老闆歸二娘有大量發揮，並以旗袍上陣，顯出風韻猶存，表面係社交能手嘅佢，對旗下囡囡算死草之餘又不失人情味，令人又愛又恨。
入行多年終於「升呢」做主演，對Carisa嚟講真係個大喜訊，佢話拍咗TVB劇咁多年係第一次做女二，Carisa續指拍攝《本尊》嘅同時要兼顧《愛‧回家之開心速遞》同《你好，我的大夫》外，當時仲要為演唱會排舞背歌詞，每日休息時間極少。另因二娘與大夫嘅醫生角色性格大不同，故拍攝時搞到有啲「精神分裂」；而喺《本尊》Carisa最開心可以同韋家雄合作，同對方拍對手戲笑唔停，兩人劇入面仲會有好多調情戲。
Carisa喺劇中近乎全程旗袍Look，突顯身材美態，佢謙稱自覺身形未夠完美，並笑指買咗大量「有袋打底褲」派街坊，方便劇中囡囡開工，加上拍攝期間正值嚴寒，旗袍裝束又較單薄，故每次開工都會狂黐暖貼。Carisa劇中嘅髮型亦需費時打造，以三個假髮造成，每逢整頭至少花上個幾鐘，認真唔簡單。
劇中強勢加持綠葉仲有公認演技好嘅李成昌同韋家雄，演戲經驗長達45年嘅昌哥以「演乜似乜」馳名，之前昌哥同監製梁耀堅憑《異搜店》結局一幕帶畀觀眾演技新境界之衝擊，今次二人再度攜手令人引頸以待。昌哥今次飾演大好人五族房鎮鎮長辛虎，角色溫文有禮又善良，更係位不折不扣嘅「愛妻號」，同飾演佢老婆嘅黎燕珊有好多感人嘅對手戲。而出名係電視城「開心果」嘅韋家雄，飾演為錢「不擇手段」嘅惡霸金爺，雖然金爺講金唔講心，某些手法更相當極端，但由於為人蝦碌，搞笑位接連不斷，喜感爆燈，所以即使演壞人都唔會令人厭惡。
《本尊就位》1月29日起逢周一至五晚 20:30 翡翠台