《中年好聲音》唱將曹敏寶與梁浩銓早前傳出雙雙出軌，梁浩銓曾受訪表示暫時同大肚老婆分居，又指二人分開不牽涉第三者，曹敏寶稱兩人只係朋友關係劃清界線。曹敏寶噚日喺社交平台留言「患難見真情；你若盛開，清風自來」回應緋聞，今午喺IG再貼與老公合照，稱早幾日全年最凍嗰日去咗嘉年華玩，似係貼全家福力證家庭幸福。
曹敏寶於2018年與科學家林潤生結婚，二人育有一對仔女，曹敏寶前年出戰《中年好聲音》曾向老公發表愛的宣言：「老公沒有你，我甚麼都不是」，不過梁浩銓曾半開玩笑式表示喜歡女方，又有指梁浩銓手上紋有「MC」，令曖昧關係甚囂塵上；近日忽然傳出曹敏寶出軌介入梁浩銓家庭嘅傳聞，事後曹敏寶表示獲得丈夫支持及信任，指當初自己患焦慮症處於低谷，「佢喺度，今日亦都一樣」，佢受訪時稱最擔心媽媽受不實傳聞困擾，亦有感激一眾朋友嘅關心，緋聞傳出後已跟梁浩銓冇再聯絡，而曹敏寶今日再次貼出家庭照似係再次暗示獲老公信任。