郭嘉文於2016年被爆跟李澤楷相戀後便絕跡娛樂圈，郭嘉文升呢變「千億女友」生活極富貴，不過喺2021年有傳二人分手，更有傳郭嘉文已搬離豪宅，搬去村屋生活，郭嘉文近期常跟圈中閨密林凱恩同鄺潔楹（Judy）相聚，噚晚佢哋一行三人去睇Twins演唱會卻睇到爆喊。
Judy喺IG上載睇騷影片，片中見Judy心情high爆全程大叫並不時揮動應援手燈，當唱到《眼紅紅》，Judy即更激動走音，三女當聽到Twins唱《相戀6年》一齊感動落淚，郭嘉文更哭成淚人，未知係佢情路觸景傷情，定係回想圈中閨密一直陪伴頓時好感觸！？
Judy喺IG笑指噚晚離開嗰陣，前排觀眾仲話佢唱得好好聽，Judy心諗唔係個個有跟住唱咩，後來佢睇片知自己唱成咁就明晒；林凱恩亦有貼出睇騷片，見三女表情多多，一時嘟嘴扮錫錫一時又興奮跟住唱，林凱恩特別鳴謝演唱會最佳伴侶Judy，三女更約定「下個10年再來聽」，不少網民見Judy好high，好奇問「唔知以為你飲醉」。
郭嘉文於2016年情人節被爆與「小小超」李澤楷同遊日本，其後郭嘉文淡出娛圈，更購入九龍塘逸瓏天池屋成交價1.068億元，之後佢被目擊與李澤楷去多國旅行，李澤楷更首度回應「We are fine, thank you」，郭嘉文於2019年更陪李澤楷一齊出席賽馬日活動，間接承認戀情，不過近年已未見二人公開出席活動，更盛傳二人分手。