盧冠廷視唐書琛為一生所愛 親解當年追贏油王個仔原因

盧冠廷同太太唐書琛最近接受程凱欣與麥卓華嘅電台節目錄音訪問。啱啱出咗新碟嘅LoLo，表示今次邀請咗唔同年代嘅音樂人合作，佢亦做咗好多唔同風格嘅歌曲，務求一擊即中。
左起：麥卓華、盧冠廷與太太唐書琛、程凱欣。
LoLo曾經創作出唔少經典歌曲，講到創作技巧，佢話好多時見到個畫面已經有旋律出嚟：「都係Train返嚟，好似肌肉都係靠練返黎，腦筋都可Train返黎，呢個係一個秘密。你要用潛意識，要開放畀宇宙Download落嚟畀你，同練氣功一樣。貝多芬創作第六交嚮曲，佢三日三夜作唔出，攰喇！決定唔諗，上天就即刻打畀佢，話佢知『係咁呀！傻佬！』所以神來之筆，唔係諗出黎，係個天畀你。」
盧冠廷指太太唐書琛係自己嘅一生所愛。
LoLo創作嘅《一生所愛》成為經典金曲，主持人問到佢太太係咪佢嘅「一生所愛」？LoLo即刻話係，仲講到明只有太太可以幫到佢：「冇佢冇盧冠廷，我個名都係佢作。我所有出名嘅歌，歌詞都由佢寫，冇佢冇我，所以冇辦法啦！」而唐書琛亦表示：「如果你信有緣份呢樣嘢，我都覺得我哋點解好似孖生。」

唐書琛指佢同LoLo嘅想法好似，笑言佢哋就好似一早約定好，今世要一齊做啲咩或者玩啲咩。節目入面唐書琛罕有分享同LoLo相識經過，佢指當時任職公關經理嘅自己，要訪問盧冠廷，當時見到對方嘅相，第一個感覺就係好「寸」同「沙塵」。
盧冠廷自爆當年點樣追贏油王個仔，贏得美人歸。
而嗰次訪問入面，佢問到LoLo點解一個喺美國世界性歌曲創作比賽贏咗冠軍嘅人，返到香港呢個彈丸之地，卻只係位列第四？當時LoLo答佢：「Just matter of taste!」當時唐書琛覺得對方好豁達，而再唔係「寸」。

對LoLo另眼相看嘅唐書琛，笑指LoLo常日講當年係自己主動追求佢。LoLo聽到後就為太太澄清，佢話太太以前係位靚女，現在都是，以前太太其中一個追求者係中東油王個仔，當時見到對方送花熱烈追求，感覺競爭好大，但自己就未有展開追求攻勢，LoLo笑住話：「我就特登當佢冇到，佢咁就中招，咁就做咗我老婆，你話幾容易。」唐書琛指盧冠廷開了人生另一個角度給她看。