與羅蘭合體出席活動 胡楓分享健康小錦囊

胡楓 同 羅蘭 姐呢排經常影形不離，呢日佢哋又孖住出席一個長者活動，活動當日天氣相當寒冷，修哥同羅蘭姐都有做足保暖準備，羅蘭姐仲用咗幾個暖包取暖添，至於92歲嘅修哥就一向無用暖包嘅習慣，佢話只要著多件衫帶條頸巾就已經夠暖，精神奕奕嘅佢更喺台上帶頭高歌一曲《情花開》，炒熱全場氣氛，寒冷嘅天氣都瞬間變得溫暖呀。

除咗唱歌之外，修哥更同在場嘅長者們，分享健康小錦囊，佢提醒大家啱啱瞓醒覺，唔好即刻落床，最好動作放慢一啲，等個人定啲先落床，各位老友記好好記住呢個健康小貼士啦。