中年好聲音2丨鄭梓浩抱病唱出失戀味道 顏米羔康復養聲狀態回勇

送免迎龍嘅兩集《中年好聲音2》展開新主題，14強選手挑選評判陳慧嫻嘅金曲出戰，最終會有兩位選手被淘汰，嚟緊4號晚會播出上半場賽事，八位選手會上陣比拼。揀咗慧嫻首《戀戀風塵》作賽嘅古淖文都話首歌實在難度好高，因為首歌音域好闊，又有一種講故仔嘅感覺，中間又有一段急口令，再要將個情緒推到最高有種爆發嘅感覺。

帶病上陣嘅鄭梓浩獻唱《去吧!》，但就因為把聲沙沙地嘅感覺，反而帶出咗首歌嘅味道，連原唱兼評判嘅慧嫻都話佢呢把聲好適合唱呢首歌，因為有種好似喊完先去唱嘅感覺。

之前幾輪都病住比賽嘅顏米羔，呢輪就狀態回勇，佢事前都刻意養聲，希望獻唱《我心不死》時有最好表現，佢話因為之前把聲受傷，上一輪獻唱《幸福之歌》時都唔理想，好彩上次同今次出賽之間有段時間可以休息，令佢有足夠時間養聲備戰。