鍾欣潼唔夠血打側手翻生意外 為安全起見暫停招牌動作

Twins演唱會嚟到第九場，大家最期待孖妹打側手翻嘅畫面竟然無出現，令現場嘅觀眾都覺得奇怪。事關喺第八場演唱會嘅時候， 阿嬌鍾欣潼打側手翻時不慎跌親，仲有傳阿嬌扭柴，令大家都好擔心，不過大會就解釋當晚阿嬌因為唔夠血而跌親，所以身體較弱，公司擔心佢再腳軟跌親受傷，所以就暫停側手翻環節。

休息咗兩日嘅Twins越唱越勇，紅館再次成為萬人K房，差唔多每首歌都係萬人合唱。每晚演出，歌迷最期待梗係Twins落台握手環節，阿Sa蔡卓妍喺第八場嘅時候，仲發現自己嘅初戀男友現身捧場，頓時引起全場哄動，不過佢就大頭蝦，握漏咗對Twins好重要嘅音樂人伍樂城，最後由阿嬌提醒下，佢再次落台同伍樂城握手捕鑊。

嚟到每晚感人時刻，Twins分享22年嚟成軍之路感受，不過喺第九場嘅時候，佢哋就語出驚人引發笑彈，阿Sa突然語重深長話：「如果22年前我生咗個仔，佢已經22歲啦!不過無發生到，不過22年後嘅今日，可以喺紅館開到演唱會，都真係一個奇蹟，因為有好多組合，行行吓就會走散咗，嗌咗交或者各自有更好發展。」阿嬌就補充一句「鬼叫我哋唔嗌交咩。」