李李仁與合夥人爆財務糾紛 遺憾太太陶晶瑩創業好意變調

李李仁與太太陶晶瑩（陶子）投資嘅副業，最近跟合夥人爆發財務糾紛，雙方各執一詞，李李仁兩公婆不滿合夥人中飽私囊，對方反指佢哋兩公婆拖欠貸款，雙方最終對簿公堂，陶子日前開直播交代事件，過程中更激動落淚，呢日李李仁出席公益活動，指已循法律途徑解決問題。

李李仁大方回應表示佢哋唔係壞人，只想好好做一件事冇諗過變成咁，多謝大家關心，希望律師及法院去幫佢哋作一個秉公裁斷，李李仁坦言事件冇對佢哋有太大影響，認為呢次係一個經驗，笑指老婆喺屋企以淚洗面，被問財產有冇被查封，李李仁笑言自己冇咩財產，目前只好以法律途徑解決。

李李仁又指由於事件進入法律程序，詳情唔方便講太多，對於品牌面臨被查封嘅命運，李李仁覺得好可惜，原來創立呢個品牌背後有一段浪漫故事，李李仁遺憾太太好意變調。