StarTalk一氣呵成版丨吳家麗由性感女郎變慈母 任達華讚敬業:係一位真正演員

StarTalk一氣呵成版丨吳家麗由性感女郎變慈母 任達華讚敬業:係一位真正演員

任達華、吳卓羲、陳紫萱同張建聲主演嘅電影《源生罪》,想帶出人與人之間溝通嘅重要,呢日佢哋就作客《StarTalk》接受主播 王鎮泉 訪問,當中吳卓羲指現今社會大家都只靠訊息嚟交流,少咗面對面以言語嚟溝通,佢覺得僅以文字嚟對話,始終會少咗語氣語調同情緒,而《源》片正正就係想帶出用說話交流嘅重要。

任達華亦提供促進大家關係嘅方法,佢指即使大家住喺香港唔同地區,都可以透過手寫信同postcard,以手寫文字嚟傳遞思念,華哥話:「通過呢樣嘢,除咗科技上嘅溝通外,間中拎嚟睇一睇親手寫嘅嘢,呢個回憶就永遠喺個心入面。」

提現實生活中吳家麗視任達華為男神,但偏偏今次喺電影入面對方就要演華哥嘅媽媽,對此華哥大讚對方係真正嘅演員,指對方可以享受演出母親嘅角色,華哥又指吳家麗係一個無可複製嘅性感女郎,無論眼神定動態都係無可複製,華哥話:「呢個女仔做我阿媽,你諗下我哋要掉低幾多嘢!」亦因為咁令華哥對吳家麗相當佩服,指對方係一位真正演員而唔係明星。

對於電影喺多個外國影展獲獎,任達華指絕對係一個肯定,同時張建聲與吳卓羲又調侃陳紫萱奪「最佳女主角」後信心與氣場都有所改變。陳紫萱坦言首部演出嘅電影就可以入圍影展兼得獎相當開心,而如願與任達華合作嘅吳卓羲,就指自己一直好欣賞對方,而喺合作後發現對方另一面,相當值得學習。

StarTalk一氣呵成版丨張繼聰從未向太太示弱 鄧麗欣對婚姻仍有保留

由 張繼聰 、鄧麗欣 等人主演嘅賀歲片,嚟到續集更令觀眾引頸以待,阿聰同Stephy呢日接受《StarTalk》 王鎮泉 嘅專訪時,都有分享呢次再合作嘅感受。

由於第一集成績相當好,所以阿聰都坦言呢次係集體冒險嘅拍攝旅程,戲中佢同Stephy演一對恐婚夫妻,關係既昇華咗亦複雜咗,而演員間嘅默契更係有增無減。講到最難忘嘅一場戲,阿聰就話係有一幕自己要喺Stephy面前表現出男人軟弱同崩潰嘅一面,而Stephy護夫嘅對白更令阿聰動容。

阿聰話現實生活中,自己都算係幾傳統嘅既男人,未試過喺太太面前示弱,所以佢話自己喺囝囝眼中係一個鐵人,試過有次自己因為整傷叫痛,囝囝因為未見過爸爸呢一面而嚇到喊。

戲中劇情感人之外,服裝造型都令Stephy好難忘,著慣婚紗拍戲既Stephy,已經相當純熟,跑跑跳跳都難唔到佢,反而佢話戲中要著一條好窄既伴娘裙以及只可以碎步走既魚尾裙,先令佢好頭痛呀。

講到婚姻呢個話題,Stephy就話自己原生家庭因為父母離異,所以佢自細就思考婚姻呢個問題,有時覺得唔係必須,甚至會覺得不可信,至於結婚多年嘅阿聰,就覺得每個階段都會有不同變化,亦唔害怕會有咩考驗。

至於對票房壓力呢個問題,兩位就似乎無呢方面嘅憂慮,Stephy話做好本份已足夠,而阿聰就話對作品好有信心。

 相關推薦

熱門搜尋