楊千嬅入五與逾千歌迷慶祝 坦率分享年前低潮情緒低落

星期六踏入50歲生日嘅 楊千嬅 ，舉行小型音樂會派對，同歌迷會逾千名Fans一齊迎接「入五」，呢日佢唔止選唱咗唔少平日甚少公開演唱嘅歌曲，令歌迷非常驚喜，佢亦分享近幾年嘅心路歷程，希望大家人生面對困難時唔好放棄自己，真情流露令全場歌迷同台前幕後都感動到千嬅一齊落淚。

千嬅生日前早已收到唔少歌迷要求一齊慶祝，於是佢就花兩星期緊急籌備呢次Fans聚會生日會，千嬅話：「我喺香港出生長大，50歲一定要喺呢度同家人朋友過，好多謝你哋陪我過呢個生日，我真係冇諗過，自己唱歌會唱到半百，哈哈....除咗感恩、感激，呢段咁長人生路程，回頭望係非常精彩，亦從冇遺憾。今日嚟得嘅朋友，我知你哋已經係我家人， 感謝你哋多年來選擇咗我，聽住我嘅歌，同我一齊成長， 我好耐冇喺香港表演，我唔想喊呀，喊完鼻涕又變痰，唱唔到好唔抵，哈哈。」

千嬅同過千歌迷分之享近年心情時落淚

千嬅先以《火鳥》一曲展開呢晚嘅party，之後接連獻唱多首歌曲，佢再同Fans傾偈時話： 「呢幾年你哋過得好嘛？我知大家走過唔同經歷，都一定係非常之唔容易，我自己都經歷咗好大考驗，相信大家都目測到我嘅過程，感謝曾經好擔心我嘅朋友，你哋唔駛擔心我，我過得好好！係、過程係好唔容易，但係我終於知道，楊千嬅出生就係要學識解決問題，我發現我回望人生，我都係笑比喊嘅多，都係開心嘅人生。」

佢又勉勵大家要保持正面

「 過去嘅日子，經歷高山底谷，得到好多養份同智慧，我今日好想分享比大家聽，之前嗰幾年其實都幾難過，你見到我唔係好出嚟，匿埋咁耐，時肥時腫，比人影到畸形樣，哈哈哈......新時代網絡風暴係一個好震憾嘅經歷，我乜都遇過晒， 幾十歲人我同自己講，有咩未見過？ 真係低處未算低，當我經過呢段日子，我發覺自己真係好強大，今日好感恩，上天比我係有力氣時，經歷呢個浩瀚人生。」

佢又提到自己曾經歷情緒問題：「低潮嘅情緒無色無味，當人負面時，要容許自己唔開心，我都試過死頂，唔想俾人知我唔開心，刻意扮開心嗰陣嚇親好多人，大家好擔心我，嗰一刻我又迷惘又唔知發生咩事，好困擾。尤其見到自己啲音樂，CD碎到一地都係，個心好痛，我連朋友都唔敢再關注，你鬧我冇問題，唔好鬧埋我啲朋友，諗住一個人撐唔好害人，曾經我覺得好恐怖，所以首先選擇熄機，唔好睇唔好理，唔好聽比自己時間消化。」

千嬅坦言近年面對低潮心情一度到谷底

千嬅又指要多謝歌迷對自己嘅不離不棄：「今日我想同愛我嘅人講，希望你記得，面對任何困難，記住有心跳就有希望，唔好放棄自己。我希望你哋可以愛自己，要有健康身體，永遠面對挑戰最高難度時，加油提升自己嘅能量，遇到最壞最唔開心嘅事，都係可以逆轉 。我50歲都做到，你哋咁後生，你哋可以活得更精彩！

千嬅細訴心事時多次眼眨淚光，到最後依然淚崩，不過就搞笑話：「死啦，化咗好耐㗎隻眼妝，我呢個水瓶座好跳，唔知自己講緊咩，你自己砌番埋佢啦。人生無去無來，音樂係有來有住，我會努力做更多新作品，唱多啲歌，希望可以繼續鼓勵到你哋。」

聚會最後大會推出大生日蛋糕，全場歌迷同千嬅合唱生日歌，到活動完結歌迷仍不願離去，不停大叫Enore，千嬅更要苦勸大家話：「真係唔可以留啦，場地10點閂門，我生日剩返兩個鐘，你哋俾我同屋企人朋友過啦。」