星光路上丨沈可欣中學時期愛上演戲 哽咽表示演出得觀眾肯定好開心

曾經報讀過工聯會演戲課程、香港演藝學院表演系藝術（榮譽）學士課程、無綫電視藝員訓練班等演藝訓練嘅沈可欣，呢日接受《星光路上》潘盈慧嘅訪問，同大家分享佢踏上演藝路嘅歷程。

沈可欣表示自己喺中學年代，因為欣賞完一場話劇後，對舞台產生濃厚興趣，之後仲因為咁而報讀興趣班。直到自己讀完預科後，曾一度糾結過報唔報讀演藝，最終由好友為佢遞交申請表而順利入讀。

入行多年，沈可欣演出過唔少劇集，當中有啲角色更令觀眾印象難忘，好似喺《踩過界》入面要同老公楊證樺飾演一對聾啞夫妻，沈可欣表示當時劇組安排咗佢哋去相關嘅中心學習手語，雖然要熟習運用手語嚟「講」對白係相當困難，但因為抱住尊重手語嘅態度，所以好用心學，幸好當時私下可以同老公對戲。

至於講到《愛·回家之開心速遞》Rebecca一角，沈可欣話無諗過觀眾反應會咁好，所以當出街有觀眾同佢講讚佢做得好為佢打氣時，沈可欣哽咽咁話係好大嘅鼓舞，感動觀眾睇到佢哋嘅努力。