春浪音樂節 香港站丨雨神蕭敬騰提樂迷帶雨具入場 軒公自薦去《春浪》其他海外站

台灣著名嘅戶外音樂節《春浪音樂節》，今年將會嚟到香港舉行2024《春浪音樂節》香港站！演出陣容包括：蕭敬騰、A-LIN、戴愛玲、小宇宋念宇、艾薇等等，而張敬軒同樂隊RubberBand將會成為香港代表！
雨神 蕭敬騰 叫大家入場記得帶雨具！
已經好耐冇嚟香港演出嘅蕭敬騰，話好掛住香港樂迷，但礙於老蕭有「雨神」嘅封號，所以主辦單位就「溫馨提示」一眾fans要帶雨具入場，同時亦希望香港Fans嘅熱情，可以打破「雨神」落雨嘅命運。同樣好耐冇嚟香港演出嘅小宇，以及初次到香港演出嘅艾薇，就話掛住香港嘅歌迷同美食。
歌姬Ａ-Lin想嚟香港食美食。
同樣對香港美食抱有期待嘅仲有歌姬A-LIN，佢笑言除咗嚟「飲飲食食」外，亦希望可以同Fans喺街上偶遇，A-LIN表示：「很期待去香港演出，距離上一次到香港已經很久的時間，希望在這一次的演出能夠再見到熟悉的歌迷朋友們，香港～～我來了！」
張敬軒自薦跟去《春浪》其他地方嘅演出。
而軒公張敬軒就希望將《春浪》嘅熱情帶嚟香港：「因為場地都近海邊，希望可以將春浪墾丁站嘅海邊音樂節元素，帶畀香港嘅入場觀眾享受！希望到時大家入場可以玩得High啲！唔知佢哋有冇其他海外站嘅表演，可以嘅Mark埋我玩，因為我當同大家去旅行放吓假！」
RubberBand首次參予《春浪音樂節》。
而RubberBand嘅6號就話《春浪音樂節》被「Band仔」視為盛事：「當然知道《春浪音樂節》，呢個係台灣其中最具代表性嘅音樂節，我哋幾個咁多年嚟都好希望可以參加一次。一個可以run咗咁多年又咁有影響力嘅音樂節，無論對band仔定樂迷，都有好大嘅吸引力，今次主辦單位將春浪帶到嚟香港，相信唔只我哋急不及待，樂迷都一定非常期待！」