金像獎|提名名單公開《白日之下》狂吸16項入圍 林保怡爭影帝:即刻去買隻雞還神先

金像獎|提名名單公開《白日之下》狂吸16項入圍 林保怡爭影帝:即刻去買隻雞還神先

第42屆 香港電影金像獎 星期二公佈各個獎項嘅入圍名單,今年各獎項都競爭激烈,其中以真實新聞事件改編嘅《白日之下》一舉連獲16項提名,成為今屆入圍片中之最,至於《年少日記》同《金手指》就同樣以12項入圍緊隨其後。

而最矚目嘅影帝之爭,將由 梁朝偉 黃子華 林寶怡 盧鎮業 同 大鵬 之間惡鬥,保怡亦以語音訊息分享佢嘅興奮心情。而影后就由 謝安琪 王丹妮 衛詩雅 鍾雪瑩 同大熱門 余香凝 幾位新生代競爭,Jennifer就指希望全片拍檔一齊走上紅地氈喇。

男配角方面競爭一樣非常激烈,老戲骨 姜大衞 將與小演員 黃梓樂 、李尚正 仲有影帝級嘅 吳慷仁 同 謝君豪 激爭。女配角則由 金燕玲 韋羅莎 梁雍婷 加上 楊偲泳 同 廖子妤 之爭。

以《毒舌大狀》中富家女殺人後利用家族以影響審訊一角入圍最佳女配角嘅廖子妤,就話收到電影有多個入圍嘅喜訊之後魂魄都唔齊,而入圍最佳新演員嘅 吳冰 亦一樣非常高興。

而今屆入圍最佳電影嘅,就包括票房破盡紀錄嘅《毒舌大狀》加上《白日之下》、《年少日記》、《命案》同《金手指》五部佳作嘅劇烈競爭喇。

余香凝入圍金像獎被視為大熱 同門新春齊集開年盼凱旋而歸

踏入龍年,唔少藝人都整裝待發,務求新一年以全新面貌同大家見面,好似去年喺影壇有極隹成績嘅 余香凝 ,就同同門 廖子妤 陳穎欣 林千渟 麥子樂  徐頴堃 余潔滢 許月湘 李玗蓁  梁雋彥 加上 吳嘉禧 李月兒 林嘉宏 劉志偉 林芝羽 等聚首一堂齊齊嘆開年飯迎接新一年,希望兄弟姊妹們都龍年行大運,大家都豐衣足食呀。

古天樂旗下嘅一班藝人熱熱鬧鬧迎龍年

啱啱過去嘅兔年,Jennifer、Fish仲有小師妹 許月湘 於電影演出「大豐收」,分別入圍今屆電影金像獎角逐最佳女主角、最佳女配角同最佳新人殊榮,而Fish仲盼望姊妹Jennifer今年可以於金像獎舞台得獎,佢話:「揭曉入圍名單前一晚,其實我瞓唔着,好緊張,好想你(Jennifer)憑《白日之下》呢個角色入圍,真係好好睇,希望新一代香港電影會有更多好作品,好想見證Jennifer領獎。」

余香凝、許月湘同廖子妤齊齊入圍金像獎嘅唔同獎項

而被視為大熱嘅Jennifer就以平常心看待:「見到小師妹(許月湘)入圍好開心,佢好專業,而且又演藝學院畢業,希望以後金像獎名單會經常見到佢嘅名。」

至於同樣默默耕耘嘅Yanny、林千渟、麥子樂、Cheronna同Zoe,新一年亦繼續會迎接新挑戰,Zoe仲透露會初嚐電影滋味,而Yanny就話:「上年過得好精彩,試好多新嘢,去咗唔同地方,自己作品亦有好嘅回響,新一年會繼續多姿多彩,因為我個人好冇記性,就算啲嘢重複發生,都好似新體驗,好開心。」

一眾女將都話已經準備好龍年迎接全新挑戰喇

而麥子樂過去一年經歷唔少人生大事,新年佢就祝願大家身體健康,有健康先可繼續享受人生。至於林千渟就希望龍年有唔同機會再接觸電影同電視節目,而Cheronna就計劃新一年會再推出新歌,亦希望喺不同範疇有工作機會。

吳嘉禧就話希望今年有機會再推出新歌

一眾靚仔靚好新年都不時會被催婚同催拍拖,但係佢哋就笑言會答:「關你咩事!」喇,不過如被老闆 古天樂 催婚的話,Yanny就搶答話會反問:「我知我知!『咁幾時到你呀?』」令全場眾人都哈哈大笑呀。

 相關推薦

熱門搜尋