StarTalk丨鄧麗欣重視相處多於婚姻 張繼聰直認迷戀太太新鮮感

StarTalk丨鄧麗欣重視相處多於婚姻 張繼聰直認迷戀太太新鮮感

鄧麗欣 同 張繼聰 前年有份主演嘅賀歲片,因為疫情而改咗喺中秋檔期上映,仲創出香港好多票房嘅紀錄,續集嚟緊將喺慶歲檔期上映,Stephy同阿聰呢日就作客《StarTalk》接受主播 王鎮泉 訪問,阿驄話今次戲中會用好長篇幅去講每個角色嘅成長,喺上一部戲中,佢飾演嘅二佬對Stephy飾演嘅Monica係死心塌地之外,但因為成長經歷導致性格有缺憾,而呢集就會講佢呢個缺憾對婚姻有咩影響。Stephy話今次會再深化入去講,就好似恐婚嘅阿聰以為佢想結婚,但其實Monica本身都係恐婚,因為佢嘅成長同樣都係有所影響,令佢情緒好波動。

講到現實生活,Stephy同樣來自單親家庭成長,由細到大都會思考婚姻究竟係乜嘢,又好似唔係必須,又好似唔係好相信,佢話而家嘅心態係順其自然,最重要係搵到一位你可以同佢行落去嘅人,願意將心入面嘅嘢拎出嚟畀佢睇,而對方又願意去接受你,而究竟係咪婚姻,Stephy反而着重兩個人相處嘅關係。

結婚多年嘅阿聰,都話以往對婚姻都有好多諗法,計埋拍拖到結婚都相處咗好多年,所以唔好話關係有變,連佢自己本身都有變化。阿聰覺得唔同階段都有樂趣同考驗,但佢本身係唔擔心接受考驗,而婚姻中一啲開心同簡單嘅快樂係其他事物取替唔到。阿聰又乘機讚太太謝安琪不時都被佢發現有新鮮感,令佢迷戀,阿聰舉例早前太太剪咗短髮,好似變咗第二個人一樣,感覺幾正。佢又話當生咗小朋友之後,有時一家四口食下午茶,望住兩兄妹一齊玩,就會覺得好幸福同埋好神奇,因為係同身邊嘅太太一齊創造出嚟。

StarTalk一氣呵成版丨張繼聰從未向太太示弱 鄧麗欣對婚姻仍有保留

由 張繼聰 、鄧麗欣 等人主演嘅賀歲片,嚟到續集更令觀眾引頸以待,阿聰同Stephy呢日接受《StarTalk》 王鎮泉 嘅專訪時,都有分享呢次再合作嘅感受。

由於第一集成績相當好,所以阿聰都坦言呢次係集體冒險嘅拍攝旅程,戲中佢同Stephy演一對恐婚夫妻,關係既昇華咗亦複雜咗,而演員間嘅默契更係有增無減。講到最難忘嘅一場戲,阿聰就話係有一幕自己要喺Stephy面前表現出男人軟弱同崩潰嘅一面,而Stephy護夫嘅對白更令阿聰動容。

阿聰話現實生活中,自己都算係幾傳統嘅既男人,未試過喺太太面前示弱,所以佢話自己喺囝囝眼中係一個鐵人,試過有次自己因為整傷叫痛,囝囝因為未見過爸爸呢一面而嚇到喊。

戲中劇情感人之外,服裝造型都令Stephy好難忘,著慣婚紗拍戲既Stephy,已經相當純熟,跑跑跳跳都難唔到佢,反而佢話戲中要著一條好窄既伴娘裙以及只可以碎步走既魚尾裙,先令佢好頭痛呀。

講到婚姻呢個話題,Stephy就話自己原生家庭因為父母離異,所以佢自細就思考婚姻呢個問題,有時覺得唔係必須,甚至會覺得不可信,至於結婚多年嘅阿聰,就覺得每個階段都會有不同變化,亦唔害怕會有咩考驗。

至於對票房壓力呢個問題,兩位就似乎無呢方面嘅憂慮,Stephy話做好本份已足夠,而阿聰就話對作品好有信心。

 相關推薦

熱門搜尋