張繼聰獲Do姐嘲似木村拓哉 拒接收美譽 妒忌魏浚笙天生靚仔

張繼聰獲Do姐嘲似木村拓哉 拒接收美譽 妒忌魏浚笙天生靚仔

賀歲片《飯戲攻心2》將會喺大除夕公映,執導兼編劇嘅陳詠燊Sunny率「飯團」一家包括鄧麗欣Stephy、張繼聰、王菀之Ivana、林明禎、陳湛文及魏浚笙Jeffrey喺剛過去嘅星期日於電影放映後,同鄭裕玲(Do姐)嘅網上頻道合作《The Do Show》合作,進行現場版對談,齊齊分享感受。
 賀歲片《飯戲攻心2》嘅演員出席影後會。
Do姐同眾演員大談幕後花絮時有不少爆笑時刻,Do姐不單止大讚阿聰年紀逐漸成熟,更越大越似木村拓哉,阿聰馬上截停Do姐:「千祈唔好咁講,麻煩剪走呢段。」Do姐續指:「有時睇IG post,睇到以為木村出po,原來係你嚟嘅。」阿聰笑言:「你呢啲係誅我唔係幫緊我,我呢次死緊。大家都係木村粉絲,唔好侮辱佢。」
Do姐讚張繼聰似木村。
男神Jeffrey新加入團隊,佢話自己拍攝時都做足備,喺戲中佢會搣甩平日官仔骨骨一面:「好享受自己污糟邋遢嘅造型,因為好爽,望到大家嫌棄自己個樣會好享受。」Do姐追問係唔係好少人對佢面露嫌棄?阿聰就忍唔住出聲:「好寸啊你,我呢啲受咗成世。」Do姐即玩踢爆:「轉個彎嚟讚自己靚仔。」眾人起哄令Jeffrey招架唔住,隨即自嘲兼補鑊話:「我都覺得自己嘔心,不過的確係享受,多謝導演悉心安排。」
 張繼聰話妒忌Jeffrey靚仔。
而陳湛文被問到如果要創辦一隊電競隊嘅話,會改咩名?佢鬼馬回應:「邪釘橫揮(三夫)。」即時令現場拍爛手掌,阿聰大讚兼補充:「真係一聽個名就知猛,但大家唔好亂諗嘢,因為Peter本身係人夫,戲中又排第三,所以先叫人夫,唔係你哋諗嘅《三夫》(Peter曾主演的電影)。」
導演陳詠燊上場一齊解答觀眾問題。
此外,觀眾發現戲中有唔少鄭伊健嘅影子,Sunny回應:「香港男仔應該都對伊健哥哥有種情義結,因為佢係香港幾個流行文化嘅icon,如《古惑仔》、《風雲》等。所以寫劇本時下意識提及幾次,揀歌時又碰巧揀中他的歌曲,令伊健哥哥的精神不停出現在我們戲中。」最後Sunny被問到有冇興趣搵Do姐拍第三集,佢立即答應,不過Do姐就事先聲明:「我拍戲好麻煩㗎,我冇佢哋咁easygoing,佢哋咁nice。」

被張繼聰翻出跳舞舊片 張家輝勸大家畀佢平安渡餘生

鄧麗欣、張繼聰、林明禎、陳湛文、王菀之、魏浚笙主演嘅賀歲電影《飯戲攻心2》呢日舉行首映,張家輝、米雪、廖子妤、譚玉瑛等都有現身捧場。

家輝呢晚係應張繼聰邀請出席,眾人見到佢現身都非常驚喜。提到阿聰話之前考古,搵返家輝以前載歌載舞嘅舊片出嚟,家輝聽到後話其實有啲片自己都已經唔記得咗,佢搞笑咁叫大家唔好再搞呢啲嘢:「畀我平平安安咗渡過埋我嘅餘生。」令在場眾人捧腹大笑。

可以邀請到家輝嚟自己主演嘅電影首映,阿聰就興奮到話以後會全勤出席對方嘅電影首映,至於講到視家輝為老師嘅原因,阿聰話自從拍完對方執導嘅電影後,每次自己拍戲上遇到有困難,都會打畀對方請教,所以覺得對方係自己其中一位老師呀。而首次同家輝見面嘅陳湛文,就話如果有機會可以畀對方指導一下就非常好。Stephy就表示咁耐以嚟都未正式同過家輝合作,但對方畀佢嘅感覺就相當親切,而已經同張家輝合作過嘅王菀之,指上次合作嘅戲份太短,希望下次可以長啲呀!

講到喺農曆年期間嘅謝票安排,Jeffrey就話自己準備咗墨寶,而明禎就話到時會着旗袍現身,除咗因為有新年氣氛外,仲覺得着旗袍係一種福氣,至於問到Jeffrey到時會唔會一齊着?佢就笑言自己太大隻,如果佢着旗袍會撐爆件衫呀!

 相關推薦

熱門搜尋