中年好聲音2｜譚輝智獻唱《歸來吧》 肥媽感動爆喊　劉可被Foul繼續保持正能量

《中年好聲音2》初二播出第九部曲《陳慧嫻金曲賽 喜氣洋洋賀十二強！》下半場，經過一輪激戰，越唱越強嘅實力唱將 譚輝智 獻唱《歸來吧》，憑真摰歌聲將曲中寂寞、委屈同思念等情感發揮得淋漓盡致，肥媽被感動得毛管戙兼爆喊，張佳添更俾出首個20分，最終輝智獲得全集最高分93分，第三度獲得MVP，而王玥同劉可則被淘汰。

對於輝智演出，陳慧嫻大讚：「你係後起之秀，成為四大天王其中一位！你呢個男仔Version我好滿意，呢隻歌好難唱，但你完全揮灑自如。」肥媽講評語時再度落淚：「我哋成日出去做嘢，除咗疫情，我三十幾年冇同屋企人過年，佢唱出咗嗰種感覺(離鄉別井)，我嘅感受比任何人都深，你唱時我已經喊同毛管戙。」

而一舉俾出20分嘅張佳添則話：「你將我第一次嘅20分攞走咗，畀你Touched到，無論係你嘅聲線定係表情，感受到好想家嘅感覺。」周國豐笑言：「點解你靚仔咗咁多，又偶像又有實力。」

譚輝智第3度獲得MVP，呢集演出更出現首次20分

勇奪93分嘅輝智最終第三度獲得MVP，負責頒發MVP嘅陳慧嫻話：「佢令我好Surprise同估唔到，佢將一隻女仔歌變成咁費玉清！」而內斂嘅輝智亦都笑言：「想多謝Rita老師(韋綺姍)，人生第一次學唱歌就係Rita老師教，學咗好多嘢，同埋多謝添Sir畀咗20分，我驚今晚瞓唔着。」

14名選手演出完畢後，同樣獲得79分嘅劉可、陳蒨葶、以及75分嘅王玥留喺危險區，王玥因為獲得最低分毫無懸念被淘汰，而劉可同陳蒨葶「邊個有得留低」就由評審團退庭商議，最終劉可被淘汰，宣布結果嘅張佳添坦言：「呢個絕對係好困難、好痛苦嘅決定，都有啲傷感，要離開嘅係劉可，由第一集你畀到我哋驚喜，到中間畀到啲好正、有啲爭議性嘅演出，其實你係一個真正嘅Artiste，你要繼續唱歌，唱多啲好歌。」

一眾評判退席討論出局嘅係劉可定劉蒨葶

而被Foul嘅劉可未有太大傷感，繼續保持正能量，佢話：「好慶幸企喺呢個舞台，始終我太耐冇唱喇，咁多位都好犀利，呢一刻我都好開心，唔係好傷感。今次最開心係可以見到陳慧嫻老師，雖然今次呢隻歌唱得有失水準，但好想同你講你係我畢生嘅偶像，最後仲要多謝我嘅屋企人、Fans同埋朋友，係我最大嘅Back Up。」

失準嘅劉可最後被淘汰

12強名單分別包括： 鄭梓浩、陳俞霏、陳蒨葶、林若盈、安雅希、顏米羔、沈宗賢、陳燕娜、古淖文、黃劍文、劉威煌同譚輝智。