元祖主播新春Gathering|ENews老鬼聚會賀老友得獎 緋聞賤嘴乜都講

元祖主播新春Gathering|ENews老鬼聚會賀老友得獎 緋聞賤嘴乜都講

TVB娛樂新聞台 2006年啟播,多年來唔少藝人都曾經係我哋嘅一份子,而早前喺《萬千星輝頒獎典禮2023》分別獲得最佳男、女主持嘅 周奕瑋 麥美恩 加上不時喺唔同音樂節目擔任主持 嘅 許文軒 ,仲有唔同娛樂新聞現場都有佢身影嘅 潘盈慧 ,就齊齊都係ENews成長嘅老友,呢日佢哋就趁住新春齊齊聚會,祝賀Jarvis同Mayanne更上一層樓喇。

相識多年,呢日就梗係嘈到拆天喇,難得公司請食飯,一班老鬼就梗係講「舊時」啦,而Edmond同Mayanne嘅陳年緋聞,原來就係因為失戀而成,Mayanne仲狠批Edmond比自己更女人。

身為老友最鍾意就係互相傷害,無論大家嘅感情生活,而邊個私下又係最Mean嘅一位?呢集就統統拎晒出嚟講,趁大年初三應個赤口嘈返夠本喇。

許文軒被爆多毛但有脫髮危險 周奕瑋破天荒解釋無拖拍因由

周奕瑋同麥美恩,早前喺《萬千星輝頒獎典禮2023》分別摘下最佳男、女主持獎,Enews嘅台前幕後當然好戥兩位開心啦,而好拍檔許文軒、潘盈慧早前就趁住新春同兩位聚餐兼慶祝下。

佢哋四個咁老友,一坐埋就梗係雞啄唔斷兼大爆料啦,當年啱啱入行嘅阿盈,就被指係存在感最低嗰個,而Edmond就慘被爆多毛,不過,佢哋兩個當然唔會好似方丈份人咁小氣啦,事關佢哋識咗十幾年,真係有咩唔講得呀?

Jarvis 仲諗返起當年同Edmond一齊面試,知道Edmond唱歌又叻,身形又高大,佢都當堂有啲被嚇窒,好彩最終佢兩個都可以如願加入Enews嘅大家庭,除咗成為最佳拍檔之外,兩人更建立咗深厚嘅兄弟情,私下除咗試過去海旁傾心事之外,仲一齊去過泰國旅行添,當年Jarvis短暫離開Enews去日本留學,都係Edmond勸佢唔好放棄主播嘅工作,總之佢哋嘅兄弟情就盡在不言中啦。


訪問期間,Jarvis 、Mayanne同阿盈更大爆Edmond鮮為人知嘅真性情,而Jarvis亦首談自己未拍拖嘅原因,至於成日去親邊,都一對白鞋走天涯嘅阿盈,點解咁鐘情佢對白鞋? 想知更多佢哋幾位嘅小秘密,咁就要Click嚟睇下啦。

 相關推薦

熱門搜尋