亞洲超星團｜練習生拍MV向曾志偉逗利是 丁子朗拉隊踩余宗遙家拜年

《亞洲超星團》練習生早前聚首一堂拍攝賀年MV，提早感受新年氣氛之餘，眾多小鮮肉熱情澎湃HIT爆錄影廠，當日雖然只係拍攝對嘴片段，但大家都表現得好專業，無論鏡頭前後都發放歡樂笑聲，保持住高漲嘅情緒。

黃奕斌(Hugo)好開心一大班人可以走埋一齊拍攝，大家都做出唔同嘅表情，好得意好有氣氛。而區珀豪就話缺少咗利是，唔係就會更熱鬧，丁子朗一聽到就話同曾生(曾志偉)反映吓，大家都希望逗到獎門人封利是，同時令張鎬濂疑團解開，因為佢一直都唔知區珀豪暗示緊邊位。

由受訓到比賽期間，香港代表因為經常一齊相處以及出席活動，感情相對特別好，余宗遙(DEZ)就歡迎大家去佢屋企拜年，丁子朗即示意拉隊踩場，DEZ為咗迎合節日，話唔介意小賭怡情。

而澳門代表江信熹及內地代表奧利、李權哲等都期待返家同家人過年逗利是，江信熹話澳門同香港過年傳統習俗差不多，氣氛都好熱鬧。而奧利就話最重要同家人食飯團年，然後收紅封包。當講到成為藝人後好多時都會派利是，現年只有23歲嘅李權哲就指自己暫時係《亞洲超星團》練習生，未算係藝人，身旁嘅兄弟即嘲笑佢係最成熟藝人，令佢一臉尷尬。