許紹雄全家赴澳門睇楊千嬅個唱 方麗娟再遇方中Sir：Benz雄係我另一個爸爸

楊千嬅年初五情人節喺澳門舉行一連兩場巡迴演唱會，許紹雄（Benz雄）一家大細、黎芷珊等圈中好友捧場。「方中Sir」許紹雄一向好錫「方麗娟」，千嬅跟台下嘅許紹雄打招呼及敬禮，觀眾歡呼不斷，許紹雄大方揮手答謝。

方麗娟再遇方中Sir，千嬅開心表示：「Benz雄係我另一個爸爸，同佢合作我永遠都好安心，佢係我生命中一個百樂，畀咗好多人生養份我，教咗我好多嘢，今日見到佢一家人坐喺度，我識佢個女嗰陣，佢仲讀緊書，依家結埋婚，更加戥佢開心啦！我揀咗《好不容易遇見愛》唱，人與人之間嘅緣份好微妙，每一個好朋友都要好好珍惜。」

許紹雄愛女許惠菁(Charmaine)新婚燕爾，千嬅即場畀利是送上祝福，祝百年好合永結同心，又祝方中Sir身體健康，Charmaine向台上嘅千嬅講多謝。千嬅喺情人節場為單身歌迷拉紅線，又獲歌迷送財神汽球，千嬅順利完成兩晚演出，喺慶功宴答謝台前幕後出心出力，更大派利是為大家添祝福！