賀歲喜劇《狀王之王》今個星期播出結局篇，星期一晚劇情講到阿九( 金剛 飾)向小鳳( 王子涵 飾)表白成功，可惜確立關係之後，小鳳就遭逢不幸，外出買夜宵期間慘遭迷暈兼被強暴。眼見心愛嘅女人慘被辣手摧花，令阿九失控爆喊！
另一邊廂，宋世傑( 王浩信 飾)獲邀出任英國使節阿德里安( 迪瑪 飾)嘅名譽侵損案訟師，小鳳憑紋身認出英國使節正係強暴自己嘅男子！由於案件牽涉到國家層面，世傑有感接與唔接官司都係死路一條，陷入兩難之際忍痛向玲瓏( 姚子羚 飾)休妻，並接受使節委託……
噚晚劇情緊湊，其中一幕玲瓏獲悉強暴小鳳嘅真兇係英國使節時，即時激動爆喊：「我要殺咗佢！」知道事關重大嘅世傑勸佢冷靜，但係情緒失控嘅玲瓏狠狠地將佢推向門；而喝醉嘅世傑之後對住玲瓏大拋狠話同要離婚：「我上一世唔知做錯啲咩，要娶着個咁蠢嘅老婆，我頂唔順喇，唔想再頂！」玲瓏聽罷先係忍淚怒摑宋世傑，之後再嚎啕大哭，大晒層次式喊功，演出相當搶戲。
而主演嘅王浩信、姚子羚、陳楨怡同林子聰接受TVB娛樂新聞台《StarTalk》主持王鎮泉訪問 https://youtu.be/HXqikK2s5eE ，身為導演嘅子聰透露劇情到最後一周將越來越多洋蔥。而提到子羚情緒失控場口，浩信仲爆料指子羚幾乎撞爛佈景：「嗰場戲我叫子羚盡情嚟啦，因為我都做開Gym，諗住頂得住啦，點知佢一火起上嚟將我成個人推向道門，我都嚇咗一嚇，當刻佢嘅情緒好高漲，冇理由嗌Cut㗎嘛，拍完之後我話：『你好勁喎，我後面道門差啲畀你拆咗！』」之後再提到世傑休妻場口，子羚一氣呵成爆喊戲十分搶焦，原來子聰導演為達到最佳效果，刻意安排一鏡到底拍攝手法，子羚坦言該場戲難度很高：「最大難度係喺間屋入面唔可以喊，但一出咗道門就要爆喊，好開心可以畀我一Shot 落做到呢件事，唔會斷咗嗰刻嘅情緒，因為谷住谷住 好辛苦，反而爆咗出嚟係最正！」
《狀王之王》結局篇 星期一至四晚 21:30 翡翠台