星光路上丨陳浩民五年抱四笑言愛妻「掂吓都有」 入行喪NG開工拍孫悟空壓力大

陳浩民 當年曾演《西遊記(貳)》孫悟空、《封神榜》哪吒等經典角色，相隔16年重返娘家拍劇《狀王之王》客串演「陳夢吉」，浩民接受TVB娛樂新聞台節目《星光路上》與主播 潘盈慧 談入行經過，展露真性情暢所欲言。

浩民入行前曾做銀行同業拆息從業員、副業就係做卡拉OK模特兒及臨時演員，一來貪得意玩吓，二來賺吓外快；浩民一開始做歌手，曾拍旅遊特輯，後來浩民被伯樂李添勝睇中，喺1997年於天龍八部演「段譽」呢個角色，每日開工戰戰兢兢，浩民笑指逢係遇到長對白必NG，令對手黃日華及李若彤一度擔心要NG四十次！

之後浩民收到孫悟空頭套，有幸演《西遊記(貳)》孫悟空，回想當時沸沸揚揚有傳張衞健（Dicky）唔拍，浩民冇諗過咁筍，硬住頭皮接咗呢個角色，拍攝6、7個月全程好大壓力，浩民每日要諗住台詞同走位，評價毀譽參半，有啲人鍾意、有啲人又覺得冇Dicky嗰種感覺，不過浩民好開心角色受小朋友同老人家喜愛。

浩民坦言入TVB就做主角，演藝路好順暢，後來佢去咗內地發展事業，而浩民與太太蔣麗莎於2011年結婚，婚後五年抱四，浩民笑言太太掂吓都有，太太5年冇買過衛生巾，浩民亦唔介意被傳離婚，皆因佢同太太感情甜蜜，認為把口生喺人哋度。