星光路上｜麥美恩盼將主持經驗與新人分享 對感情事隨緣暫未係時候

早前喺「萬千星輝頒獎典禮2023」攞到《最佳女主持》嘅 麥美恩 ，接受主播 潘盈慧 《星光路上》專訪，Mayanne喺台上發表得獎感受時，曾公開多謝曾志偉，仲話希望將主持嘅棒交比下一個，Mayanne話因為志偉哥都係做主持，所以佢好明白做主持嘅難處，亦好希望推快培養新人嘅一環，Mayanne話自己當年都係得到好多人嘅幫忙，先可以坐到宜家呢個位置，所以佢都好想趁自己仲後生，將自己主持嘅經驗同新人分享。


相信唔少人都記得Mayanne係選港姐出身，佢話自己最後雖然未能攞到三甲，但係就目標明確，希望能夠成為一位出色嘅主持，更視DoDo鄭裕玲為學習目標，所以參選後，佢就好快決定加入《娛樂新聞台》嘅大家庭，仲話有一次突發飛去台灣宜蘭採訪金馬獎頒獎禮，令佢相當難忘，好彩最後憑住急才以及長舌婦嘅功力，順利完成呢次嘅採訪。

而之後Mayanne更大膽向當時嘅監製提出，想加入《學是學非》做主持，而佢直率大膽嘅作風，亦成為佢之後做綜藝節目嘅條件之一。不斷求突破嘅Mayanne，之後更有機會拍劇，初嚐拍劇嘅佢話當時完全拿捏唔到，只可以抄人點演，後來佢喺《使徒行者3》入面嘅演技，令人刮目相看。


Mayanne話嚟緊都希望繼續有機會做大騷嘅主持，至於結婚呢個話題，Mayanne就話雖然喺係自己嘅List入面，但係就唔係宜家呢個時候啦。