熱播劇《狀王之王》琴晚（21 日）劇情峰迴路轉，宋世傑（王浩信飾）答應為英國使節阿德里安（迪瑪飾）出任訟師，其實只係假意投誠，目的係為埋阿德里安身收集更多證據，並趁阿德里安高興時落力氹對方飲酒，令佢喺公堂上玩自爆！不過世傑亦因此招惹殺身之禍。好在危急關頭有玲瓏（姚子羚飾）殺出救駕，玲瓏驚爆真實身份。
事件並未平息，英國使節請來嘅訟師陳夢吉（陳浩民飾）登場，同宋世傑上演世紀公堂戲，爭奪「狀王之王」寶座！而一直只喺世傑夢中現身嘅宋安（張達明飾）亦會現身，恭喜世傑同玲瓏將再次成親。而宋安仲會告知世傑一個驚天秘密，令世傑嚇到即場暈低。究竟係點樣嘅大秒密、「狀王之王」又係邊個，大家就要密切留意今晚大結局喇！
為呈現緊湊節奏，Vincent同浩民嘅唇槍舌劍公堂戲以一鏡到底方式拍攝，全長約3分多鐘。兩位為呢場戲傾盡所有Energy，更做咗唔少準備。Vincent就話：「首先要背熟晒啲對白，第二就係要食飽啲，因為真係花好多能量，基本上一拍完返到去就即刻瞓着。」
而Vincent覺得同浩民合作感覺好正，亦大讚對方嘅energy、演戲嘅節奏同埋對清裝嘅拿捏都做得好好。好榮幸可以同浩民做對手戲，覺得有少少相逢恨晚添！
相隔16年重返 TVB 拍劇嘅陳浩民早前接受無綫娛樂新聞台《星光路上》主持潘盈慧訪問，講到在《狀王》中客串陳夢吉一角坦言好大壓力，呢場戲拍攝過程好辛苦，浩民亦喺訪問中分享喺演藝圈打拼點滴，笑言自己非常幸運，未有過捱嘅日子，一出道就可以做主角，喺《天龍八部》飾演「段譽」，演藝人生好順利；出名係圈中多仔公嘅浩民同太太蔣麗莎育有 4 名子女，浩民喺訪問尾聲亦相當感謝太太出心出力照顧 4名小朋友，非常有愛。
《狀王之王》周一至五晚 21:30翡翠台播映