資深製作人陳淑芬（陳太）自1973年加入「華星娛樂」，及後1993年創辦娛樂公司，至今50 年以嚟見證及推動香港整個演藝行業興旺，陳太透露正籌備《陳淑芬•星星相識50年》一連串活動。
紀念展將於由3月21號至5月19號喺澳門倫敦人酒店舉行，觀眾可免費入場參觀；而演唱會就喺3月23號喺澳門舉行，門票不作公開發，陳太受訪問時話今年係佢入行50年，好榮幸50年內與香港演藝行業一齊成長、一齊努力、一齊創造好多光輝歷史，所以佢今年特別舉辦紀念展，並隆重其事邀請殿堂級美術指導張叔平及攝影大師夏永康Wing Shya擔任策展人，將好多難忘回憶跟大家分享。
陳太又指張國榮（Leslie）喺其演藝生涯佔有一個好重要嘅位置，而今次紀念展得到唐鶴德先生借出更多「哥哥」張國榮珍藏品，所以佢特別騰出一個比較大嘅空間去展示呢批無價寶，屆時單係「哥哥」展品便有超過100件之多，陳太續言：「喺紀念展中都會展出我多年以嚟嘅工作成品，包括珍貴照片及演出片段、80及90年代黑膠唱片、《風雲音樂劇》舞台服飾、歷年的演唱會海報，當中更有不少珍藏簽名版、工作證、場刊及紀念冊等，所有展品共800多件，展示演出團隊嘅深情感言，屆時進場參觀者可了解演出台前幕後業者嘅心聲。」
今年剛好係陳太70歲生日，合作過嘅許多藝人歌手好友想送佢一份值得紀念禮物。陳太會邀請過去50年相識嘅好朋友參與演出，此外，陳太續指今次紀念展需要喺一個空間夠大、展期又夠長嘅地方舉行，因為展品非常豐富，希望以最華麗、最獨特嘅方式呈現，當然要更長的展期，讓更多人欣賞才唔會辜負張叔平同夏永康嘅心血。
