張家輝回憶疫情隔離生活試裸跑 鬼馬讚王大陸女人緣不斷

張家輝忙住為親自執導嘅電影進行後期製作，但呢日亦有現身佢同阮經天、王大陸主演嘅新戲放映會。家輝喺戲中有唔少動作場面，佢透露因為導演鍾情動作片，所以特意請咗一位韓國武指嚟香港為佢哋進行訓練。家輝笑言完成訓練後，武指就好似自己師父一樣，大讚對方好認真。

電影拍攝期間正係疫情最嚴峻時候，家輝當時經歷過幾次隔離生活，笑指喺酒店房望出走廊，見到工作人員進行消毒嘅情景同驅魔人一樣。最令大家估唔到嘅係，當時家輝哥喺房內以跑步打發時間，仲突發奇想試過裸跑。

家輝呢次同兩位小生合作感覺新鮮，大讚兩人夠博命。而家輝被問道知唔知女人緣爆燈嘅王大陸經常換女友時，佢好鬼馬話喺電影拍攝時見過大陸女友探班，不過到電影上映，大陸就帶咗另一個女仔出現，讚大陸有本事先可以咁有女人緣。