與 李影 份屬多年好友嘅 黃淑儀 接受訪問時稱，早前佢同李影分別由香港過年後返抵加國。而淑儀姐弟婦為李影多年麻雀牌友相交甚篤，唯當地時間下午約2點，突收到弟婦通知李影離世，大感愕然難以置信下佢再向另一共同好友打聽，始證實消息。
Gigi姐引述現場消息指，身邊朋友趁元宵探望，上門時發現李影躺於床上甚為不適，左邊面同眼角瘀黑，言辭模糊後報警。
救護員收到消息趕抵現場後，一直為李影施行心肺復甦法急救，可惜未能回天。消息令佢嘅一眾好友都非常震驚，因為李影一向身體壯健，甚少病痛，回想可能因對方日前於寓所跌傷引起。
Gigi姐對事件感到非常意外，原定明日已約定大班朋友聚餐，豈料突然天人永隔。同李影相識半世紀嘅佢提到，早喺麗的年代已經成為朋友，後來雙方先後移居加拿大，待產時李影更居於自己寓所，感情亦因而更加深厚。
兩人當時更講笑指腹為婚，子女他日成人要對親家。雖為戲言，不過兩家感情依然非常好，李影兩位千金到今日依然會笑稱佢為「奶奶」，未諗到突然發生憾事。