星光路上完整版丨陳浩民演藝生涯未捱過 取代張衞健做孫悟空壓力大

陳浩民相隔16年重返娘家拍劇，為《狀王之王》客串演「陳夢吉」一角。呢日浩民亦接受TVB娛樂新聞台節目《星光路上》訪問，同主播 潘盈慧 分享多年演藝生涯點滴。

浩民雖然以歌手身份出道，但入行前原來佢曾做銀行同業拆息從業員，為賺外快兼抱住好玩心態，間唔時亦會做卡拉OK模特兒同埋臨時演員，因緣際遇下浩民被伯樂李添勝睇中從而得到拍劇機會。回顧多年經歷，浩民感覺自己非常幸運，因為一拍劇就已經做主角，可以喺《天龍八部》中飾演「段譽」，而「段譽」更成為佢經典代表角色之一。雖然浩民自覺自己嘅幸運度未到含「金匙羹」出世一樣，不過比起好多人已經係好好彩、好順利。不過講返當年做段譽嘅點滴，佢最難忘就係逢係遇到遇到超過三行既長對白必會NG，令對手黃日華及李若彤一度擔心要NG四十次！

除咗段譽，浩民另一個經典角色就當然係孫悟空！當年張衞健（Dicky）以《西遊記》孫悟空一角受到觀眾喜愛，但後來Dicky會唔拍續集既傳聞亦鬧得沸沸揚揚，所以喺浩民收到孫悟空頭套時都嚇左一跳。後來浩民硬住頭皮接演《西遊記(貳)》成為新孫悟空，雖然成個拍攝期全程好大壓力，播出後評價毀譽參半，但浩民都好開心角色受小朋友同老人家喜愛。

轉戰內地發展事業多年嘅浩民，相隔多年再拍TVB劇，喺《狀王之王》客串陳夢吉。但其實呢次客串都令佢壓力好大，事關要做一個令觀眾唔討厭嘅幽默反派絕非易事。

講到家庭生活，浩民同太太蔣麗莎喺2011年結婚，婚後五年抱四，搞到浩民都笑指太太掂吓都有，真係5年冇買過衛生巾。雖然浩民同太太曾被傳出婚變，但佢就完全唔會將閒話放喺心上，佢亦多謝太太用心照顧家庭啊。